U dzień maskoŭskich pratestaŭ Pucin kataŭsia ŭ Krymie na matacykle FOTA
Dzień, kali ŭ Maskvie i dziasiatkach inšych rasijskich haradoŭ išli mitynhi pratestu z patrabavańniem sumlennych vybaraŭ i vyzvaleńnia aryštavanych pa spravie ab «masavych biesparadkach», prezydent Rasii Uładzimir Pucin pravioŭ u kampanii bajkieraŭ z motakłuba «Načnyja vaŭki», paviedamlajuć infarmahienctvy.
Fota: kremlin.ru.
U subotu Pucin adpraviŭsia ŭ anieksavany Rasijaj Krym na bajk-šou, arhanizavanaje «Načnymi vaŭkami». Na źlot kala hary Hasforta ŭ Sievastopali Pucin prybyŭ na čale kałony bajkieraŭ.
Prezident RF asabista siadzieŭ za rulom matacykła «Urał» z kalaskaj. U kalascy siadzieŭ kiraŭnik Kryma Siarhiej Aksionaŭ, a za śpinoj Pucina - časovy vykanaŭca abaviazkaŭ hubiernatara Sievastopala Michaił Razvažajeŭ.
Pa pravuju ruku Pucina supravadžaŭ lidar «Načnych vaŭkoŭ» Alaksandr Załdastanaŭ pa mianušcy Chirurh.
Na jaho matacykle łunaŭ trykałor ź dziŭnym simvałam, vonkava padobnym na hierb SSSR, tolki z rasijskim dvuchhałovym arłom zamiest ziamnoha šara ź siarpom i mołatam.
