Piać fejkaŭ rasijskaj prapahandy pra Biełaruś za apošni miesiac. Vy vierycie choć u adzin?
Biełaruska-rasijskija adnosiny pieražyvajuć nie samuju składanuju stadyju, ale kanviejer rasijskaj prapahandy pracuje tak, što fejki ŭsio adno vyrablajucca z zajdrosnaj stabilnaściu.
Alaksandr Łukašenka, Mikałaj Łukašenka i Uładzimir Pucin na Vałaamie.
Na siońnia ich hałoŭnym imparcioram stali telehram-kanały: «Trykataž», «Bulba prastołaŭ», «Niazyhar», «Uschodniaje prytvorstva». Nakiravanyja hetyja fejki najpierš na rasijskuju aŭdytoryju, bo naŭrad ci niechta ŭ Biełarusi moža pavieryć u takoje tryźnieńnie. Što novaha pisali pra našu krainu ŭ hetych kanałach? Ahlad «NN».
Biełaruś z NATA budzie vajavać suprać Rasii
Tak interpretavali słovy Alaksandra Łukašenki na ŭračystym pryjomie z nahody 3 Lipienia. Kiraŭnik Biełarusi tady skazaŭ, što nie choča, kab naša kraina stała častkaj Rasii ci NATA.
«Łukašenka faktyčna abvieściŭ pra vychad Biełarusi z ADKB. Pa sutnaści, jon skazaŭ, što kali biełaruskaje vojska nie budzie spraŭlacca ź niejkaj situacyjaj — uvod rasijskich vojskaŭ i ŭvod vojskaŭ NATA źjaŭlajucca raŭnaznačnymi opcyjami», — piša kanał «Bulba prastołaŭ».
Łukašenka kazaŭ, kali Biełaruś mocna paprosić, to NATA dapamoža abaranicca. Pry hetym jon udakładniaŭ, što sam hetaha nie choča.
«Faktyčny namiok Łukašenki na ŭdzieł Biełarusi ŭ kampanii NATA suprać RF — pačatak kanca intehracyjnych utvareńniaŭ staroha ŭzoru: Sajuznaj dziaržavy, JEAES, ADKB», — padsumoŭvaje «Bulba».
Pierachod Biełarusi va ŭnijactva
Jašče adzin uzorny fejk ad «Bulby prastołaŭ». Unijactvam pałochali va Ukrainie, ciapier hetuju samuju fišku dastali i ŭ biełaruskim kirunku. Nahodaj stała toje, što Alaksandr Łukašenka padčas naviedvańnia Vałaama nie pierachryściŭsia na kamieru, jak Pucin.
«Łukašenka nie chryścicca, tamu što ŭ Biełarusi daŭno pryniata pryncypovaje rašeńnie ab kanviertacyi krainy va ŭnijactva z płaŭnym pierachodam da katalicyzmu. Kraina zabitaja pijaram kaściołaŭ, pravasłaŭje źmiešvajuć z brudam usie miedyja, prasoŭvajecca łacinka (identyčnaja polskaj movie, na jakuju pieravodzili Biełaruś paśla Bieraściejskaj carkoŭnaj unii 1596 hoda)», — piša «Bulba».
Zapadozryć aficyjnuju Biełaruś u prychilnaści da ŭnijactva mohuć tolki ludzi, jakija zusim nie raźbirajucca ŭ našych realijach, albo śviadomyja pravakatary.
Makiej i Ejsmant majuć rejtynh vyšejšy za Łukašenku
Niejkija sakretnyja rejtynhi papularnaści palitykaŭ źmiaščała na svajoj staroncy redakcyja «Trykatažu». Niezrazumieła, što za sacyjałahičnyja kampanii pravodzili tyja apytańni, chutčej za ŭsio, ličby ŭziatyja prosta sa stoli dla bolšaj rezanansnaści.
«Aktualny rejtynh Łukašenki — 25,8%. Jaho pa-raniejšamu abhaniajuć kiraŭnik MZS Makiej (31%) i pres-sakratarka Ejsmant (28%).
Usie astatnija — premjer Rumas, ministry, kiraŭnik AP Kačanava, pieršyja asoby parłamienta — majuć rejtynh jašče nižejšy, čym u prezidenta», — adznačaje «Trykataž».
Kurs na Jeŭrasajuz i biaźviz dla biełarusaŭ
Viadoma, jak biez kački ŭ padobnym klučy. Varta Łukašenku było sustrecca z pradstaŭnicaj Jeŭrasajuza Andrea Viktaryn (sprava ŭ tym, što jana skančvaje misiju ŭ Minsku i pierajazdžaje ŭ Jerevan), jak znoŭ papaŭźli čutki: ciapier dakładna Biełaruś pavaročvajecca ŭ bok Zachadu.
«Paśla Vałaama Łukašenka ŭziaŭ kurs na tranzit u bok ES, zajaviŭšy, što dla dyjałohu z Zachadam bolš niama nijakich pieraškod. U lutym nastupnaha hoda čakajecca anałah ŭkrainskaha biaźviza dla biełarusaŭ, jakija zmohuć hłyboka intehravacca ŭ Jeŭropu jak indyvidualna, tak i kalektyŭnym padradam», — pierapoščvaje kanał «Niazyhar» tvorčaści inšaha kanała «Majstar piara».
Havorka pra jeŭrapiejski biaźviz ŭ realnaści nie viadziecca. Prosta cana šenhiena dla biełarusaŭ moža apuścicca da toj, jakaja ŭžo šmat hadoŭ isnuje dla hramadzian Rasii.
Začystki prarasijskich čynoŭnikaŭ
Pamiatajecca, što niešta padobnaje raniej užo abiacaŭ «Trykataž». Asabliva ŭzbudzilisia jany paśla zatrymańnia za chabar namieśnika dziaržsakratara Rady biaśpieki Andreja Uciuryna. Ciapier luboha zatrymanaha čynoŭnika buduć adnosić da prarasijskaha kryła. Vyhadnaja pazicyja, jakuju nijak nie spraŭdziš.
«U Biełarusi rychtujucca novyja začystki prychilnikaŭ sajuza z Rasijaj siarod dziaržsłužačych», — anansuje «Niazyhar».
