Łukašenka: Biełaruś nie bačyć pieraškodaŭ dla ŭzmacnieńnia palityčnaha dyjałohu ź ES i hatova da hetaha
Pra heta Alaksandr Łukašenka zajaviŭ siońnia na sustrečy z kiraŭnikom pradstaŭnictva ES u Biełarusi Andrea Viktaryn, piša BiełTA.
«Niama siońnia pieraškod dla taho, kab uzmacniać dyjałoh nie tolki pa ekanamičnych, ale i palityčnych pytańniach. Biełaruś da hetaha hatovaja. Davajcie budziem u hetym kirunku ruchacca, nie čakajučy jakich by tam ni było padziej: ci to parłamienckich, ci to prezidenckich vybaraŭ. Miarkuju, našy adnosiny važniejšyja za ŭsialakija palityčnyja kampanii ŭ vas ci ŭ nas», — padkreśliŭ Alaksandr Łukašenka.
Kiraŭnik dziaržavy taksama adznačyŭ vialiki ŭkład Andrea Viktaryn u raźvićcio adnosin pamiž Biełaruśsiu i ES, padkreśliŭšy, što apošnija hady jany raźvivajucca najbolš efiektyŭna. «Ja vam udziačny ad imia biełaruskaha naroda za hety pramiežak času, jaki vy adpracavali i jaki byŭ vielmi pazityŭny ŭ našych adnosinach ź Jeŭrasajuzam, — skazaŭ jon. — Ja vielmi spadziajusia, što na zamienu vam pryjedzie dastojny čałaviek. Ja chaču pažadać vam usialakich pośpiechaŭ u Armienii. Heta siabroŭskaja Biełarusi kraina, u čymści vielmi padobnaja, tamu vam lohka budzie ŭvajści ŭ kurs spravaŭ u Armienii. I nie zabyvajcie, što čatyry hady — heta ŭsio ž taki peŭny termin u vašym žyćci, i jon źviazany ź Biełaruśsiu. My zaŭsiody budziem rady bačyć vas, tym bolš dla vas vizy nie patrebnyja».
Asobnuju padziaku Alaksandr Łukašenka vykazaŭ za finansavuju padtrymku, jakuju ES robić prajektach u Biełarusi, u tym liku pa raźvićciu infrastruktury. «Heta treba budzie nie tolki biełarusam, ale i jeŭrapiejcam», — padkreśliŭ jon.
Andrea Viktaryn u svaju čarhu dadała, što za apošnija niekalki hod Biełarusi i Jeŭrapiejskamu sajuzu ŭdałosia pabudavać daviernyja adnosiny adzin z adnym. «Pamiž nami adbyvajecca adkryty dyjałoh jak z palityčnych temach, tak i pa ekanamičnych, a taksama pa śpiecyfičnym, asobnych pytańniach, takim jak handal, mytnyja pytańni i hetak dalej», — adznačyła jana.
Jak paviedamlałasia, u lipieni na pasadu kiraŭnika pradstaŭnictva ES u Biełarusi byŭ vyłučany načalnik upraŭleńnia Rasii Jeŭrapiejskaj słužby źniešnich dziejańniaŭ Dzirk Šubiel. Andrea Viktaryn nakirujecca pradstaŭlać intaresy Jeŭrasajuza ŭ Armieniju.
