Natalla Kačanava naviedała Žyrovicki manastyr. I dała niekalki ŭkazańniaŭ
Raboty pa rekanstrukcyi zvanicy i brackaha korpusa Śviata-Uśpienskaha Žyrovickaha manastyra pavinny być zavieršany da kanca sakavika 2020 hoda, adznačyła siońnia ŭ čas naviedvańnia manastyra kiraŭnica Administracyi prezidenta Natalla Kačanava, paviedamlaje BiełTA.
U mai 2020 hoda adznačacca 550-hodździe z času źjaŭleńnia Žyrovickaj ikony Božaj Maci i 500-hodździe zasnavańnia Śviata-Uśpienskaha Žyrovickaha manastyra.
«Manastyr — vialikaja pravasłaŭnaja śviatynia. Jubilejnyja daty nie zastanucca pa-za ŭvahaj. Śviatočnyja mierapryjemstvy pryciahnuć vialikuju kolkaść haściej. Važna pravieści śviata na samym vysokim uzroŭni. Padrychtoŭka da jaho ŭžo startavała. U najbližejšy čas budzie stvorany arhanizacyjny kamitet, budzie prapracavana kancepcyja śviata», — paviedamiła Natalla Kačanava.
Padčas naviedvańnia manastyra kiraŭnica Administracyi prezidenta aznajomiłasia z chodam rabot pa rekanstrukcyi abjektaŭ manastyra. Raniej, u pryvatnaści, byŭ uviedzieny ŭ ekspłuatacyju budynak trapieznych z haścinicaj dla pałomnikaŭ.
Nieŭzabavie pačnucca raboty pa rekanstrukcyi brackaha korpusa. Jana praduhledžvaje abnaŭleńnie fasada, dachu, zamienu voknaŭ i dźviarej, inšyja ramontnyja raboty. Prajekt užo hatovy i prachodzić ekśpiertyzu. Taksama viaducca prajektnyja pošuki pa restaŭracyi zvanicy manastyra.
«Važna zaviaršyć hetyja raboty da kanca sakavika 2020 hoda, kab da śviatočnych mierapryjemstvaŭ abjekty paŭstali ŭ abnoŭlenym vyhladzie. Pry hetym asablivuju ŭvahu treba nadać jakaści: pamyłak, pralikaŭ na abjektach takoha ŭzroŭniu być nie moža», - adznačyła Natalla Kačanava. Jana taksama źviarnuła ŭvahu na nieabchodnaść pilnaha i ŭzvažanaha padychodu da dobraŭparadkavańnia ahraharadka Žyrovičy.
Płan padrychtoŭki da śviata praduhledžvaje rekanstrukcyju, ramont i ŭvod u ekspłuatacyju kala 30 abjektaŭ. U tym liku budzie abnoŭlena centralnaja płošča ahraharadka. Zapłanavana ciepłavaja reabilitacyja, ramont fasadaŭ, abnaŭleńnie dacha Doma kultury, navučalnych budynkaŭ i internataŭ ahrarna-techničnaha kaledža. Viadziecca kapitalny i biahučy ramont žylla, praciahvajecca abnaŭleńnie linij suviazi, haza-, voda-i elektrazabieśpiačeńnia, idzie zamiena darožnaha pakryćcia ŭ ahraharadku i na padjeździe da jaho. Usie hetyja pracy, padkreśliła Natalla Kačanava, taksama nieabchodna zaviaršyć u ścisłyja terminy, ale biez škody jakaści.
