«Maci pajechała na Vadochryšča ŭ pałonku nyrać, zachvareła — i pamierła». Raskazvaje babula zabitaha biełarusa z «DNR»
1 lipienia stała viadoma, što na ŭschodzie Ŭkrainy zahinuŭ uradženiec Homla. 21-hadovy Raman Biazrukaŭ vajavaŭ na baku tak zvanych «ŁDNR». Raman byŭ adzinym unukam žycharki Homla Alaksandry Biazrukavaj. Jahonyja baćki pamierli. «Nikomu sirata byŭ nie patrebny. Ciapier ja navat paśviedčańnia ab jahonaj śmierci nia maju», — raspaviała Svabodzie Alaksandra Biazrukava.
Raman naradziŭsia ŭ pracoŭnym pasiołku Kaściukoŭka. Ciapier heta častka Čyhunačnaha rajonu Homla.
Dom, u jakim Raman Biazrukaŭ žyŭ u Homli.
Jahony baćka pamior, kali Raman jašče byŭ mały. «Ad ankalohii. Tut u mianie doma i pamior», — kaža Alaksandra. Maci pamierła, kali Ramanu było dvanaccać hadoŭ. «Jana paśla śmierci majho syna jašče mieła dvaich sužycielaŭ, i dvaich dziaciej prydbała ź imi. Jana była prastudžanaja, i jašče pajechała na Vadochryšča ŭ pałonku nyrać. Zapaleńnie lohkich zdaryłasia — i pamierła», — apaviadaje babula.
Mały Roma na rukach u baćki.
Na pracu ŭładkavacca nia moh, dapamohi jak sirata nia mieŭ
Romu vyrašyli addać pad apieku jahonaj chrosnaj, jakaja žyła ŭ Daniecku. Chrosnaja nia mieła svaich dziaciej. Chłopčyk hadavaŭsia ŭ Daniecku, tam ža skončyŭ pieršy kurs technikumu. «U 2014 hodzie na Danbasie pačałasia vajna. Jany — maja siastra, plamieńnica — chrosnaja Ramana i jon źjechali ŭ Krym. Tam prasiadzieli try miesiacy, pakul nia skončylisia hrošy. Pryjechali ŭsie da mianie. Ale kolki čałaviek moža pražyć na maju adnu pensiju 300 rubloŭ?» — kaža Alaksandra.
Žychary Daniecku źjechali na radzimu, Raman zastaŭsia ŭ babuli ŭ Homli. «Jon tut skončyŭ adzinaccatuju klasu. Na pracu ŭładkavacca nikudy nia moh. Dapamohi nijakaj niadkul nie było. 18 spoŭniłasia — i ŭsie pra siratu zabylisia. Hrošy jamu pierastali płacić. Stajaŭ na čarzie jak sirata na kvateru — nichto nivodnaha razu nie patelefanavaŭ, nie pacikaviŭsia im», — kaža babula Ramana. [Nasamreč dziaržava vydzieliła Ramanu žyłpłošču ŭ domie ŭ Kaściukoŭcy — «NN»]
Čytajcie taksama: Zahinuŭ 21-hadovy sirata z Homiela, jaki vajavaŭ za «Navarosiju»
Raman Biazrukaŭ.
Unuk sprabavaŭ zarabić u Homli — rasklejvaŭ afišy, razdavaŭ reklamki. «Ale tych hrošaj chapała tolki na prajezd. Dva razy jeździŭ na zarobki ŭ Maskvu — adzin raz zapłacili, druhi — nie, pradaŭ mabilny, kab dajechać dachaty. Chadziŭ na naš škłozavod — prasiŭsia na pracu, nie ŭziali», — kaža Alaksandra.
U vyniku ŭnuk vyrašyŭ u 2017 hodzie viartacca ŭ Danieck. «Jon dumaŭ, što tam buduć jakija budoŭli — usio ž razbambili, lahčej znojdzie pracu. Potym pajšoŭ u apałčeńnie. Jon mnie kazaŭ, što jamu škada tych dzietak, što hinuli ŭ Daniecku. Jon abaraniaŭ prostych ludziej, a nie tych, ź vialikimi kašalkami, jakija dziaciej svaich za miažu źvieźli».
Alaksandra Biazrukava padkreślivaje, što unuk nia moh siudy viarnucca «praz zahad Łukašenki». Žycharka Homla maje na ŭvazie kryminalny artykuł za ŭdzieł u vajennych dziejańniach na terytoryjach inšych krain.
«Tak naš susied tam byŭ, vajavaŭ za DNR. Potym ciahali jaho tut, dva miesiacy ŭ SIZA siadzieŭ», — kaža jana.
Vyjšaŭ na pazycyju, zakuryŭ — i zahinuŭ
Jana viedaje z apoviedaŭ siastry, što Raman zahinuŭ, kali vyjšaŭ na pazycyju i zapaliŭ cyharetu. Śviatło ad zapalnički, vidać, zaŭvažyŭ snajper, tłumačyć jana.
«Plamieńnica była na pachavańni, chrosnaja jahonaja. Pachavali Romu ŭ pryhožym miescy, na Alei hierojaŭ. Vajennyja chavali. Tolki dahetul ja nie maju paśviedčańnia pra śmierć — plamieńnica nijak nie moža jaho tam vybić. Užo, skazała, budzie pisać u prakuraturu», — dadała Alaksandra.
Jana pierabiraje dakumenty — roznyja paśviedčańni pra śmierć: syna, niaviestki, inšych rodnych.
«Usie pamierli. Praź miesiac paśla śmierci Ramana i siastra maja ŭ Daniecku pamierła. Adny pachavańni ŭ mianie».
Praz toje, što Raman publikavaŭ u sacyjalnych sietkach zdymki ŭ vajskovaj formie i sa zbrojaj, da babuli prychodzili z KDB.
«Zdymki jahonyja hladzieli, mianie raspytvali. Jak jon tut nia moh uładkavacca na pracu, nia mieŭ nijakaj dapamohi jak sirata — to nikoha nie cikaviła. A tut zacikavilisia».
