Kiraŭnik masonskaj Vialikaj łožy Rasii: Biełaruskaja łoža stvoranaja nie pa praviłach, tamu nie moža być pryznanaja
Vialiki majstr masonskaj Vialikaj łožy Rasii Andrej Bahdanaŭ prakamientavaŭ dla «Našaj Nivy» navinu pra stvareńnie Vialikaj łožy Biełarusi. Raniej biełaruskija masony farmalna ličylisia častkaj masonstva rasijskaha.
Andrej Bahdanaŭ.
«Hetaja łoža stvoranaja nie pa masonskich praviłach i tradycyjach. Tamu nie moža ličycca rehularnaj i tym bolš pryznanaj! Bo:
1. Masonstva zachodzić u krainu z dazvołu ŭładaŭ — heta rehistracyja arhanizacyi ŭ Miniuście krainy. Hetaha ŭ dadzienaj łožy niama.
2. Da hetaha času na terytoryi Biełarusi pracavali tolki try Šanoŭnyja łožy (pieršasnyja arhanizacyi) abjadnanyja ŭ dystrykt «Biełaruś» pad jurysdykcyjaj VŁR (dakumienty na rehistracyju padadzieny ŭ Miniust).
Pa masonskich tradycyjach i praviłach terytoryja Biełarusi była zaniata VŁR. I biez dazvołu VŁR ni adna rehularnaja masonskaja jurysdykcyja nie moža na hetaj terytoryi adkryvać svaje łožy.
Vialikija łožy Polščy, Ukrainy i Litvy praihnaravali heta. Tamu 26 maja VŁR prypyniła svajo pryznańnie hetych Vialikich łožaŭ da adnaŭleńnia status-kvo na 23 traŭnia, kali na terytoryi Biełarusi byŭ tolki dystrykt «Biełaruś».
3. Braty VŁR mocna zaniepakojenyja tym faktam, što Vialikija łožy Polščy, Litvy i Ukrainy šturchajuć biełaruskich bratoŭ na parušeńnie zakona (bo pracy łožaŭ buduć biez rehistracyi arhanizacyi), a heta pahražaje štrafami i kryminalnymi spravami ŭ dačynieńni da bratoŭ».
U Rasii masonstva nie maje vialikaha ŭpłyvu. Vialikim majstram źjaŭlajecca 49-hadovy palittechnołah Andrej Bahdanaŭ. Jon byŭ suzasnavalnikam vaśmi karlikavych partyj — ad «Pravoho dieła» da «Kamunistyčnaj partyi sacyjalnaj spraviadlivaści» i navat bałatavaŭsia na prezidenckich vybarach 2008 hoda, sabraŭšy 1,8% hałasoŭ.
