The Times: Łukašenka moža stać našym chaŭruśnikam u baraćbie suprać Pucina
Realizacyju płanaŭ Rasii adnosna anieksii Biełarusi možna praduchilić, kali Zachad budzie pavodzić siabie razumniej, čym heta było ŭ vypadku z Ukrainaj, piša žurnalist brytanskaha vydańnia The Times Rodžer Bojes.
Fota: BiełTA.
Žurnalist źviartaje ŭvahu, što čas Uładzimira Pucina zakančvajecca ŭ 2024 hodzie, i jon pavinien budzie zrabić dla siabie vybar. Pa Kanstytucyi jon nie zmoža znoŭ stać prezidentam.
Jon moža pahadzicca z časovym panižeńniem da ŭzroŭniu premjer-ministra, a zatym viarnucca na pasadu prezidenta ŭ 2030 hodzie. Adnak da taho času jamu budzie 78 hadoŭ, adznačaje Bojes.
Najbolš pryvabnym varyjantam dla hetaha hałoŭnaha kramloŭskaha drapiežnika moža stać anieksija Biełarusi, piša žurnalist.
«Kali taki varyjant budzie realizavany, a ekanomiki dźviuch krain buduć całkam intehravanyja, to ŭ vyniku moža źjavicca Rasija+. U takim vypadku Pucin zmoža biez prablem stać kiraŭnikom hetaha novaha dziaržaŭnaha ŭtvareńnia, i tady jamu nie treba budzie navat zajmacca pieravodam svaich supracoŭnikaŭ z kramloŭskich kabinietaŭ u inšaje miesca», — piša kałumnist The Times.
Prablema z padobnym scenarom u tym, što Biełaruśsiu ŭžo kiruje Łukašenka. Dla zadavalnieńnia ambicyj Pucina Łukašenku pry takim scenary pryjdziecca pasunucca.
Brytanski žurnalist adznačaje, što taki scenar budzie aznačać palityčnaje supraćstajańnie, u jakim značnuju pieravahu budzie mieć Kreml.
Abrańnie prezidentam Ukrainy Uładzimira Zialenskaha moža ŭskładnić žyćcio Pucinu, ličyć žurnalist The Times. Pucin choča pasłableńnia zachodnich sankcyj, adnak jon nie maje namieru admaŭlacca — ni na ŭschodzie krainy, ni ŭ Krymu — ad taho, što jon atrymaŭ z dapamohaj siły i chitraści ŭ 2014 hodzie. Tamu Pucin budzie sprabavać razdźmuć prablemy dla taho, kab luby varyjant budučaha miru byŭ zaklučany na jaho umovach, a nie na ŭmovach Zialenskaha. Novy hvałt na Danbasie pryviadzie da novaha raŭndu sankcyj z boku Zachadu. Pierazahruzka ŭ adnosinach pamiž Kramlom i administracyjaj Trampa pierastanie być aktualnaj. Heta moža taksama prymusić Łukašenku nakiravać svoj pozirk u bok Zachadu ci navat Kitaja ŭ pošukach bolš stabilnaha partniorstva.
Žurnalist adznačaje, što Rasija ŭžo nie vałodaje tym ekanamičnym upłyvam, jakim jana karystałasia da taho, jak sankcyi stali adčuvalnymi.
Najbolšaja prablema dla biełarusaŭ, ličyć brytaniec, ekanamičnaja, pakolki biznes-madel Biełarusi amal całkam zasnavana na rasijskich subsidyjach. Maskva choča abkłaści mytam tuju naftu, jakuju jana nakiroŭvaje da svajho susieda. Łukašenka piarečyć i kaža, što tak nie pavodziać siabie z samym blizkim chaŭruśnikam Maskvy. Adkaz Kramla: paskarajcie intehracyju dźviuch krain, kab źjaviłasia supolnaja mytnaja słužba, supolnaja valuta, supolnaja sudovaja sistema i supolnaja kanstytucyja. Pastaŭcie rasijskija vajennyja bazy. Hulajcie ŭ kamandzie, i tady my zmožam ustalavać unutranyja ceny na pradavanuju vam naftu.
Inšymi słovami, addajcie častku svajho suvierenitetu, zrabicie ŭniosak u piensijny płan Pucina, i tady my budziem praciahvać vas padtrymlivać.
Žurnalist ličyć, što heta nie pryviadzie da ŭvarvańnia va ŭkrainskim styli, choć aficery NATA pry praviadzieńni vajennych hulniaŭ uličvajuć takuju mahčymaść. Rasija, na dumku Bojesa, budzie ŭzmacniać cisk na Łukašenku, sprabujučy takim čynam schilić jaho da chutkaha abjadnańnia.
Kałumnist zaŭvažaje, što niama nijakaha sensu ŭ tym, kab terminova zaprašać łukašenkaŭskuju Biełaruś u Jeŭrasajuz abo ŭ NATA. Ale kali Maskva praciahnie zahaniać našu krainu ŭ kut, Biełaruś, mahčyma, u najbližejšy čas paprosić kredyt u Mižnarodnaha valutnaha fondu (MVF). Umovaj hetaha moža stać praviadzieńnie hłybokich ekanamičnych reformaŭ. Mahčyma, Łukašenka budzie damahacca taksama finansavaj padtrymki z boku Jeŭropy.
«Pastupova my možam dapamahčy aŭtakratyi pačać dychać svabadniej — i pakazać Pucinu, što jon nie moža stavicca da byłych savieckich respublik jak da svajoj asabistaj hulniavoj placoŭki», — piša Rodžer Bojes.
