Stała viadomaja prahrama inaŭhuracyi Zialenskaha, a Parašenka pažadaŭ jamu paśpiachovaha prezidenctva
UNIAN
Kamanda abranaha prezidenta Ukrainy Uładzimira Zialenskaha apublikavała prahramu inaŭhuracyi, zhodna ź jakoj na 20 maja ŭ lidara krainy zapłanavana niekalki mierapryjemstvaŭ.
Zhodna z prahramaj, z 10:00 pa 11:00 pa miascovym časie (supadaje ź minskim) Zialenski pryniasie prysiahu na viernaść ukrainskamu narodu padčas uračystaha pasiadžeńnia Viarchoŭnaj rady.
Zatym prezident prybudzie na cyrymoniju pradstaŭleńnia kamandujučych vidami USU, padymie dziaržaŭny ściah i razam z žonkaj Alenaj Zialenskaj pačnie prymać kiraŭnikoŭ zamiežnych delehacyj, što prybyli na cyrymoniju inaŭhuracyi.
Paśla hetaha, z 14:30 da 17:00, Zialenski praviadzie dvuchbakovyja sustrečy z kiraŭnikami delehacyj u budynku administracyi prezidenta.
Dziejny kiraŭnik dziaržavy Piotr Parašenka napiaredadni inaŭhuracyi Uładzimira Zialenskaha pažadaŭ jamu paśpiachovaha prezidenctva.
«Źmiena ŭłady — prykmieta našaj prynaležnaści da jeŭrapiejskaj cyvilizacyi. Demakratyju my zachavali navat va ŭmovach rasijskaj ahresii. Zaŭtra ŭłada pierachodzić da novaha prezidenta, jakoha vy abrali na sumlennych i svabodnych vybarach», — adznačyŭ Parašenka.
«Ukrainu my zachavali, «Navarosiju» — pachavali. Ahresara, značna macniejšaha za nas, — spynili. Stvaryli vojska, jakoje stała adnym z najmacniejšych na kantyniencie. Abapirajučysia na mižnarodnuju praŭkrainskuju kaalicyju, jano nadziejna trymaje abaronu na Uschodzie», — padkreśliŭ Parašenka
Novaabranamu prezidentu Parašenka pažadaŭ paśpiachovaha prezidenctva. «Uładzimiru Zialenskamu žadaju paśpiachovaha prezidenctva. Jašče miesiac tamu my byli zaŭziatymi apanientami na vybarach. Ale ŭžo zaŭtra, tak zdaryłasia, što jon budzie prezidentam majoj rodnaj krainy. Krainy, jakuju lublu i ŭ čyjo jeŭrapiejskuju budučyniu ustojliva vieru. Dyk niachaj Haspodź Ukrainu zachoŭvaje, a jaje novamu kiraŭniku — dapamahaje ŭ pracy», — dadaŭ Parašenka.
