Pierasoŭnaja halereja «Biełaruś na staražytnych hieahrafičnych mapach» raspačynaje pracu ŭ Lidzie
4 maja a 16.00 u Lidskim historyka-mastackim muziei pa adrasie vuł. Pieramohi, 37a adbudziecca adkryćcio tematyčnaj vystavy «Biełaruś na staražytnych hieahrafičnych mapach».
Staražytnyja mapy ŭjaŭlajuć saboj unikalnyja artefakty i vałodajuć mahičnaj siłaj. Heta svojeasablivyja partały ŭ časie, vizualnaja mašyna minułaha, jakaja dazvalaje nam vandravać pa roznych časach i prastorach, historyjach, movach i kulturach — i praz heta šukać, razumieć, suadnosić i kanstrujavać siabie ŭ novych kantekstach i miežach. Chałściny mapaŭ pahružajuć nas u śviet vobrazaŭ, mientalnuju, duchoŭna-emacyjnuju prastoru, u hłybini našaha padśviadomaha — tudy, dzie naradžajecca čałaviečaje «Ja» i jahonaja kultura.
U adkryćci voźmuć udzieł: układalnik i aŭtar idei — dyrektar vydaviectva «Ekanompres» Eduard Kufcieryn, historyk, staršy supracoŭnik Instytuta historyi NAN RB Aleh Dziarnovič, doktarka sakralnaj teałohii, relihijaznaŭca i kulturołah Iryna Dubianieckaja.
Hości vystavy zmohuć pačuć na kankretnych prykładach, jakija cikavyja źviestki možna atrymać, čytajučy staražytnyja karty vačyma śpiecyjalistaŭ u histaryčnaj viedzie, bibleistycy, kulturałohii, vizualnaj antrapałohii. Ci majuć staražytnyja karty histaryčnuju dakładnaść albo źjaŭlajucca praduktami ŭjaŭleńnia ich stvaralnikaŭ? Ci ŭpłyvaje na dziejnaść kartohrafa sacyjalna-palityčnaja situacyja jaho času i jak heta ŭpłyvaje na budučyniu? Jak čytajucca simvały, zašyfravanyja ŭ vyjavach na mapach, što jany śviedčać pra naša minułaje i sučasnaść? I šmat što inšaje. Paśla vystupaŭ śpiecyjalistaŭ naviedvalnikaŭ čakaje ahulnaje abmierkavańnie z mahčymaściu zadać pytańni vystupoŭcam (viadučy — fiłosaf Pavieł Barkoŭski).
Hieahrafičnyja mapy razdrukavany z aryhinalnych kopij z dapamohaj ličbavaha druku i z zachavańniem usich maštabaŭ na papiery, jakaja imituje fakturu staradaŭnich map. Usie mapy majuć navukovuju atrybucyju i ekspanujucca razam. Układalnik — Eduard Kufcieryn, navukovy kansultant — kandydat histaryčnych navuk, staršy navukovy supracoŭnik instytuta historyi NAN RB Aleh Dziarnovič.
Vystava «Biełaruś na staražytnych hieahrafičnych mapach» upieršyniu vystaŭlałasia 5—16 krasavika 2019 u NCSM u h. Minsku ŭ miežach fiestyvalu intelektualnaj knihi «Pradmova»
