Pravaŭładalniki tvorčaści Coja chočuć padać u sud na biełaruski brend
U lutym pamiž biełaruskim brendam Mark Formelle i pravaŭładalnikami tvorčaści Viktara Coja paŭstała sprečka. Vytvorca adzieńnia kazaŭ, što vykanaŭ usie patrabavańni pa zachavańni aŭtarskich pravoŭ, druhi bok śćviardžaŭ, što damova z naślednikami nie zaklučana. Ciapier pravaŭładalniki majuć namier źviartacca ŭ sud. TUT.BY vyśvietliŭ padrabiaznaści ŭ abodvuch bakoŭ.
Havorka idzie ab hetaj kalekcyi. Fota: Nadzieja Bužan, TUT.BY
Pravaŭładalniki: «Ničoha zvyšnaturalnaha my nie prasili»
Pravaŭładalniki tvorčaj spadčyny Viktara Coja — jaho syn i baćka. Ich intaresy pradstaŭlaje rasijskaja kampanija «Pieršaje muzyčnaje vydaviectva» partnior jakoha — muzyčnaje vydaviectva «Hłoryja Miedyja». Kampanija vałodaje vyklučnymi pravami na vykarystańnie piesień Viktara Coja i hrupy «Kino» ŭ Biełarusi.
Raniej biełaruskaja kampanija «Hłoryja miedyja» zajaŭlała žurnalistam Euroradio, što adpraviła pretenziju Mark Formelle. U dakumiencie išła havorka pra hrašovuju kampiensacyju — jana ličyłasia b dasudovym ŭrehulavańniem situacyi. U inšym vypadku — sud.
Ci budzie «Hłoryja miedyja» sudzicca z brendam adzieńnia? Kampanija ciapier admaŭlajecca kamientavać.
U rasijskaj kampanii «Pieršaje muzyčnaje vydaviectva» raspaviali, što biełaruski bok adpraviŭ dźvie pretenzii. Mark Formelle adkazała, što brend nie parušaŭ pravoŭ, tamu što dziejnaść kampanii nie źviazanaja z muzyčnym biznesam.
— U pretenzijach havaryłasia ab vykarystańni tekstaŭ muzyčnych tvoraŭ biez dazvołu pravaŭładalnikaŭ i materyjalnaj kampiensacyi. Ničoha zvyšnaturalnaha my nie prasili. Zaraz my źbirajem dokazy, dakumienty dla zvarotu ŭ sud, — adznačyła juryst «Pieršaha muzyčnaha vydaviectva» Julija Dabrenka.
Mark Formelle: «Pravy na našym baku»
Jak raspaviali kiraŭniki Mark Formelle, adkaz na pretenziju jany sapraŭdy adpravili.
— Z «KINO» u nas usio ź jurystami vyrašana. My kansultavalisia da zapusku kalekcyi ź jurydyčnymi kampanijami, jany nie ŭbačyli parušeńni, — patłumačyŭ kiraŭniki kampanii Andrej Sierykaŭ i Śviatłana Siparava.
Ciapier jany čakajuć reakcyi.
— Kali sprava dojdzie da suda, to budziem adstojvać svaju pazicyju, — kaža Sierykaŭ.
Kiraŭniki kampanii raspaviadajuć, što brend natchniaŭsia tvorčaściu hurta, a nie vykarystoŭvaŭ, jak vakalny kalektyŭ, muzyčnyja tvory dla pracy.
— Kali my šukali pravaŭładalnikaŭ, to atrymali adkaz z Maskvy, u jakim nam skazali, što [kalekcyja adzieńnia] — heta nie pieśnia, tamu my nie možam heta licenzavać. Zrešty, heta cikavy kiejs dla jurystaŭ, tamu što niama precedentaŭ. Ujavicie, i na tym baku praŭda, i na tym — nonsens! Ale, viadoma, lepš u hetym nie ŭdzielničać, — kaža Andrej Sierykaŭ.
