Štab Zialenskaha zapatrabavaŭ novych sankcyj suprać Rasii
Ukaz prezidenta Rasii Uładzimira Pucina ab sproščanaj vydačy pašpartoŭ žycharam samaabvieščanych «DNR» i «ŁNR» nie nabližaje baki da spynieńnia ahniu, havorycca ŭ paviedamleńni kamandy abranaha prezidenta Ukrainy Uładzimira Zialenskaha ŭ Facebook.
«Ukazam ab vydačy rasijskich pašpartoŭ hramadzianam Ukrainy, jakija znachodziacca na časova niepadkantrolnych našaj krainie terytoryjach, Rasijskaja Fiederacyja pryznała svaju adkaznaść u jakaści dziaržavy-akupanta», — havorycca ŭ paviedamleńni.
Adznačajecca, što Ukraina budzie rabić usio, što ad jaje zaležyć, kab abaraniać i akazvać dapamohu ŭkrainskim hramadzianam, jakija znachodziacca na akupavanych terytoryjach.
«Ukraina taksama raźličvaje na padtrymku mižnarodnaj supolnaści ŭ pytańni abarony intaresaŭ, pravoŭ i svabod ukrainskich hramadzian na časova akupavanych terytoryjach i raźličvaje na ŭzmacnieńnie dypłamatyčnaha i sankcyjnaha cisku na Rasiju», — havorycca ŭ paviedamleńni.
