Ozon admoviŭsia adkryvać ofis u Biełarusi z-za nizkich zarobkaŭ
Rasijskaja internet-krama admoviłasia ad płanaŭ pa adkryćci ŭ Biełarusi svajho ofisa z-za nizkaj kupčaj zdolnaści biełarusaŭ. Pra heta na kanfierencyi E-commerce Day skazaŭ dyrektar pa markietynhavych kamunikacyjach internet-kramy Ozon.ru (Rasija) Aleh Daražok.
Pavodle jaho słoŭ, Ozon zasiarodzicca vyklučna na dastaŭcy tavaraŭ biełarusam z Rasii. Choć raniej płanavałasia i surjozna abmiarkoŭvałasia mahčymaść adkryćcia paŭnavartasnaha biełaruskaha ofisa. Pa słovach Aleha Daražka surjoznych inviestycyj z boku rasijskaj internet-kramy čakać nie varta. Kab Ozon pahadziŭsia na surjoznyja inviestycyi biełarusy pavinny tracić, «jak minimum 50 dalaraŭ u adnym čeku». Siońnia takich zakazaŭ ź Biełarusi niama, i situacyja vypravicca tolki z rostam zarabotnaj płaty.
Pry hetym Aleh Daražok nie vyklučyŭ, što pytańnie ź biełaruskim ofisam kampanija moža pierahledzieć u kancy hoda. Usio zaležyć ad finansavych pakazčykaŭ i rostu kolkaści zakazaŭ. Ale pakul biełaruski biznes, jaki kankuruje z Ozon moža spać spakojna, ekspansija rasijskaha hihanta admianiajecca. Usie namahańni Ozon nakiruje na aptymizacyju dastaŭki zakazaŭ ŭ Biełaruś, kab klijenty mahli atrymać svoj tavar maksimalna chutka, ciaham 48 hadzin.
Charakterna, što hłabalnych inviestycyj u elektronny handal nie varta čakać i ad Jandeksa, jaki raniej dosyć ambicyjna hladzieŭ na kašalki biełarusaŭ. Ciapier kampanija, pa słovach Jaŭhiena Ščapielina, dyrektara pa raźvićci biznesu Jandeks.Markieta (Rasija) nie maje płanaŭ pa raźvićci svajho handlovaha napramku ŭ Biełarusi ŭ častcy surjoznaha prasoŭvańnia ŭ krainie adpaviednych servisaŭ.
Atrymlivajecca, što pakul rasijski biźnies płanuje pracavać u Biełarusi «zdalok», bieź inviestycyj u ekanomiku krainy i stvareńnia pracoŭnych miescaŭ.
