Źnikłaha ŭ Homieli ŭkrainca Paŭła Hryba asudzili ŭ Rasii na šeść hadoŭ kałonii
Fota Radyjo Svaboda
Paŭnočna-Kaŭkazski akruhovy vajskovy sud u Rastovie-na-Donie pryznaŭ vinavatym u zaklikach da teraryzmu i schileńnia da teraktu hramadzianina Ukrainy 20-hadovaha Paŭła Hryba, prysudziŭšy jaho da šaści hadoŭ pazbaŭleńnia voli ŭ kałonii ahulnaha režymu, piša TASS.
Sud taksama pastanaviŭ vyličvać termin źniavoleńnia z 22 sakavika 2018 hoda (Hryba zatrymali 24 žniŭnia 2017 hoda).
Advakat maje namier abskardzić prysud.
«Budziem abskardžvać, dokazy atrymany z parušeńniem zakona», - skazała žurnalistam Maryna Dubrovina.
Adrazu paśla vyniasieńnia prysudu Pavieł abviaściŭ haładoŭku.
Pavodle suda, 27 sakavika pa 15 maja 2017 hoda Hryb, znachodziačysia na terytoryi Ukrainy, praź internet zaklikaŭ adnu z staršakłaśnic u Sočy pryvieści ŭ dziejańnie samarobnaje vybuchovaje prystasavańnie na vypusknym viečary 30 červienia, a paśla hetaha rekamiendavaŭ joj pakinuć terytoryju Rasii. Zychodziačy z tekstu abvinavačvańnia, Hryb davaŭ joj padrabiaznyja instrukcyi pa vyrabie samarobnaha vybuchovaha prystasavańnia i jaho zakładcy.
Pavieł Hryb źnik paśla pierasiačeńnia ŭkrainska-biełaruskaj miažy 24 žniŭnia 2017 hoda. Jon nakiroŭvaŭsia ŭ Homiel na sustreču z Taćcianaj Jaršovaj (u intervju žurnalistam jana pryznałasia, što sustreča adbyłasia ź inicyjatyvy FSB).
MUS Biełarusi paviedamiła, što nie zatrymlivała Hryba, a 7 vieraśnia vyśvietliłasia, što Pavieł Hryb znachodzicca ŭ rasijskim SIZA FSB u Krasnadary. Rasijskija siłaviki śćviardžajuć, što zatrymlivali chłopca ŭ Smalenskaj vobłaści.