Зніклага ў Гомелі ўкраінца Паўла Грыба асудзілі ў Расіі на шэсць гадоў калоніі
Фота Радыё Свабода
Паўночна-Каўказскі акруговы вайсковы суд у Растове-на-Доне прызнаў вінаватым у закліках да тэрарызму і схілення да тэракту грамадзяніна Украіны 20-гадовага Паўла Грыба, прысудзіўшы яго да шасці гадоў пазбаўлення волі ў калоніі агульнага рэжыму, піша ТАСС.
Суд таксама пастанавіў вылічваць тэрмін зняволення з 22 сакавіка 2018 года (Грыба затрымалі 24 жніўня 2017 года).
Адвакат мае намер абскардзіць прысуд.
«Будзем абскарджваць, доказы атрыманы з парушэннем закона», - сказала журналістам Марына Дубровіна.
Адразу пасля вынясення прысуду Павел абвясціў галадоўку.
Паводле суда, 27 сакавіка па 15 мая 2017 года Грыб, знаходзячыся на тэрыторыі Украіны, праз інтэрнэт заклікаў адну з старшакласніц у Сочы прывесці ў дзеянне самаробнае выбуховае прыстасаванне на выпускным вечары 30 чэрвеня, а пасля гэтага рэкамендаваў ёй пакінуць тэрыторыю Расіі. Зыходзячы з тэксту абвінавачвання, Грыб даваў ёй падрабязныя інструкцыі па вырабе самаробнага выбуховага прыстасавання і яго закладцы.
Павел Грыб знік пасля перасячэння ўкраінска-беларускай мяжы 24 жніўня 2017 года. Ён накіроўваўся ў Гомель на сустрэчу з Таццянай Яршовай (у інтэрв'ю журналістам яна прызналася, што сустрэча адбылася з ініцыятывы ФСБ).
МУС Беларусі паведаміла, што не затрымлівала Грыба, а 7 верасня высветлілася, што Павел Грыб знаходзіцца ў расійскім СІЗА ФСБ у Краснадары. Расійскія сілавікі сцвярджаюць, што затрымлівалі хлопца ў Смаленскай вобласці.
