Alena Łanskaja: «Ja nie chaču zasnoŭvać svaju tvorčaść na łžeramanach i hnacca za łajkami z prahladami»
My chacieli zadać zasłužanaj artystcy Biełarusi Alenie Łanskoj šmat pytańniaŭ: i pra stan biełaruskaha šou-biznesu, i pra dasiahnieńni pradziusierskaha centra «Spamaš» za 15 hadoŭ, i pra jaje vystup na kancercie ŭ honar 100-hodździa VŁKSM, i pra tearetyčnuju mahčymaść ŭdziełu ŭ śviatkavańni «BNR-101», i pra toj samy zdymak, dzie jana staić razam sa svajakami Alaksandra Łukašenki… Ale na pytańni śpiavačka pahadziłasia adkazvać tolki piśmova, tamu mieła prava vybaru. U vyniku vyjšła intervju pra karjeru i tvorčaść, trochi pra «Jeŭrabačańnie». A jašče pra kocikaŭ.
Alena Łanskaja.
«NN»: Davajcie adrazu pačniom z adboru na «Jeŭrabačańnie», dzie vy ŭ hetym hodzie byłi adnoj z členaŭ fokus-hrupy prasłuchoŭvańnia. Jak vy ličycie, ci pravilna, što adbirać pradstaŭnika krainy ŭ hetym hodzie dazvolena tolki členam žury?
Alona Łanskaja: Kožnaja kraina-ŭdzielnica ŭvodzić ułasnyja ŭmovy adboru. U hetym hodzie kiraŭnictvam pryniata rašeńnie, što vyznačać pieramožcu buduć tolki siabry žury. Chutčej za ŭsio, heta źviazana z dośviedam papiarednich adboraŭ, kali niekatoryja kankursanty arhanizoŭvali sabie hałasavańnie hledačoŭ.
«NN»: U aficyjnaj supołcy «Jeŭrabačańnie-2019» u apytancy «Ci zadavolenyja vy finalistami» 60 adsotkaŭ ludziej prahałasavali za varyjant «nie». A vy zadavolenyja? Ci jość u nas z kimści z hetych ludziej šaniec na vychad u finał «Jeŭrabačańnia»?
AŁ: Zaŭsiody jość dźvie pazicyi acenki tvorčaści. Bolšaść ludziej aceńvajuć muzyku na emacyjnym uzroŭni: padabajecca ci nie padabajecca. Jość jašče prafiesijny punkt hledžańnia. Tamu całkam łahična, što chtości zadavoleny, a chtości nie. Ja liču, što ŭ hetym hodzie členy fokus-hrupy adboru aceńvali vykanaŭcaŭ maksimalna abjektyŭna, stroha i ćviaroza, zychodziačy z taho materyjału, jaki byŭ pradstaŭleny.
Alena Łanskaja sama dva hady zapar sprabavała prabicca na «Jeŭrabačańnie». U 2012-m hodzie jana pieramahła ŭ nacyjanalnym adbory, ale potym vyśvietliłasia, što hałasavańnie było kuplenaje. U vyniku pradstaŭlać Biełaruś pajechaŭ hurt Litesound. U nastupnym hodzie śpiavačka pasprabavała svaje siły ŭ nacyjanalnym adbory nanoŭ: na «Jeŭrabačańni» śpiavačka zaniała 16-je miesca.
«NN»: Kaho ź finalistaŭ vy asabista možacie adznačyć?
AŁ: Mnie vielmi spadabałasia Zena. Ja viedaju jaje jašče da ŭdziełu ŭ novaj «Fabrycy zorak», kali jana była Zinaj Kupryjanovič. Jana brała ŭdzieł u našym sumiesnym z Nastaśsiaj Cichanovič kancertnym tury «Pra hałoŭnaje». Užo tady było bačna, što heta vielmi talenavitaja dziaŭčynka. Jak ciapier pamiataju, u pierapynkach pamiž vystupami jana za kulisami rabiła ŭroki, joj davodziłasia sumiaščać navučańnie ŭ škole z kancertnaj dziejnaściu. Zena vielmi jarkaja i svabodnaja. Padčas vystupu na adbory adčuvałasia, što jana razumieje svoj muzyčny materyjał, napisany Julijaj Kirejevaj: heta jaje rodnaje.
A jašče mianie ŭraziŭ Emanuel Imahbie. U jaho jarki vakał, začaravalnaja enierhietyka. Litaralna ź pieršych troch fraz jon začapiŭ publiku. Ja liču, jaho muzyčny materyjał całkam zrazumieły jeŭrapiejskaj publicy. Dumaju, jaho b mahli acanić.
Viadoma, šmat chto kaža, što krainu na konkursie pavinny reprezientavać tolki biełarusy. Pahadžusia. Ale kali nie pracujuć našy zvykłyja šlachu vybaru pradstaŭnikoŭ na «Jeŭrabačańnie», čamu b nie pasprabavać kardynalna źmianić padychod da hetaha konkursu?
Treba ekśpierymientavać, bo heta ŭ pieršuju čarhu šou. Pieramahajuć śmiełyja artysty, jakija hatovyja ryzykavać.
«NN»: Na kaho vy sami aryjentujeciesia ŭ estradnaj muzycy? Na jakich zorak i artystaŭ (jak minimum, bačyła, što vam blizkaje toje, jak vyhladaje siońnia Džej Ło)?
AŁ: Ja słuchaju muzyku roznych stylaŭ, pastajanna adkryvaju dla siabie novyja imiony. Ja nie pierastaju dzivicca, nakolki tvorčaja fantazija šmathrannaja. Z apošniaha, što mianie zacikaviła: muzyčny prajekt «Lo moon», Jordan Rakie, Isaac Nightingale, Claire Laffut.
«NN»: Patryjatyčny klip na biełaruskaj movie «Kutočak Biełarusi» byŭ prezientavany vosieńniu, na siońnia na jutubie jaho pahladzieli krychu bolš za 150 tysiač razoŭ. Ci zadavolenyja vy takimi ličbami dla 10-miljonnaj Biełarusi?
AŁ: Niechta moža skazać, što heta mała, dla kahości heta šmat. Ciapier publika vielmi razbeščanaja kolkaściu videakantentu, muzyki.
Na žal, u sučasnym śviecie ŭsio, što stvorana z dapamohaj ciomnaha boku śviadomaści, pryciahvaje bolš uvahi, čym śvietłaje, dobraje i ščyraje. Ja nie chaču zasnoŭvać svaju tvorčaść na «praviłach šou-biznesu»: štučna padahravać da siabie intares, stvarać łžeramany, jak robiać rasijskija kalehi, nakručvać prahlady i zajmacca psieŭdapijaram. U žyćci i tak chapaje chłuśni i pryčyn dla rasstrojstvaŭ.
A mastactva pavinna natchniać čałavieka, kazać pra dobraje i viečnaje.
Kožnaja kampazicyja ŭ maim repiertuary — heta častka mianie, majoj dušy. Ja ščyraja, ja adkrytaja svajmu hledaču. Ja nie bajusia pryznacca ŭ tym, što nie idealnaja. Ja nie zaŭsiody pazityŭnaja. Byvajuć situacyi, kali znachodzišsia ŭ stresie, treba jamu davać rady. Jak i ŭsie ludzi, ja sutykajusia z takimi prablemami.
Mnie nie cikava hnacca za prahladami i łajkami, značna važniej, kab maje pracy znachodzili vodhuk u sercach słuchačoŭ.
«NN»: Ci paznajuć vas uvohule na vulicach? Prosiać aŭtohraf?
AŁ: Tak, paznajuć. Zusim niadaŭna paśla čarhovaha kancerta ja zajechała ŭ adzin z handlovych centraŭ u Minsku. Pakul vybirała padarunki, pačuła za śpinaj: «Alena, heta vy?» Z tymi chłopcami my zrabili niekalki sełfi.
«NN»: Nakolki biełaruskija estradnyja artysty zdolnyja samastojna prajechacca z turam pa Biełarusi i sabrać poŭnyja zały, biez zahonu hledačoŭ?
AŁ: Stanovišča ciapier vielmi składanaje. Asnoŭnaja krynica dachodaŭ artystaŭ (mienavita tych artystaŭ, jakija žyvuć i pracujuć u Biełarusi) — heta vystupy na pryvatnych mierapryjemstvach, karparatyvach. Što tyčycca kancertaŭ, situacyja niaprostaja. Siaredni košt kvitka, jaki realna mohuć kupić ludzi — 10—15 rubloŭ. Čysty prybytak ad takich kancertaŭ nievialiki. Ale sapraŭdny artyst zaŭsiody pracuje dla hledača. I heta hałoŭnaje.
AŁ: Jak pažyvajuć vašy kotki Jeŭłampija i Mania? U vas doma tolki jany? Vas praciahvajuć dastavać pytańniem: kali vy źmienicie ich na dziaciej i muža?
AŁ: Maje koški — zorki internetu. U ich navat jość fanaty, jakija pilna sočać za ich žyćciom. Jašče ŭ dziacinstvie ŭ našaj siamji žyła kotka, jakaja pražyła z nami 17 hadoŭ, tamu ŭ mianie z rańniaha ŭzrostu pavažlivaje staŭleńnie da žyvioł.
Pa mahčymaści ja zaŭsiody imknusia dapamahać bratam našym mienšym. Supracoŭničaju z vałanciorami, prystrojvaju biazdomnych.
Niadaŭna viartałasia z kancerta, i na adnoj z zapravak da maich noh kinuŭsia kot. Ja jaho zabrała, i dziakujučy maim padpisčykam my znajšli jamu novuju siamju.
Mnie zdajecca, siońnia ŭ Biełarusi pytańnie pa abaronie biazdomnych žyvioł staić vielmi vostra. Viadoma, možna praanalizavać dośvied inšych krain, pieraniać niejkija važnyja normy. Naprykład, uvieści abaviazkovaje čypavańnie. Ale heta tolki častkovy vychad ź situacyi. Reč u tym, što mnohija staviacca da žyvioł hrebliva, jak da nieadušaŭlonych pradmietaŭ (nabyvajuć žyvioł vyklučna dla biznesu, naprykład).
Usio čaściej možna pračytać naviny, jak dzieści z akna vykinuli sabaku, paviesili… Stanovicca žudasna i strašna! U hałavu prychodzić tolki adno: bolšaść sieryjnych zabojcaŭ pačynali mienavita z žyvioł.
Mnie zdajecca hetyja pytańni i prablemy značna važniejšyja za razvahi na temu, čamu ŭ maim domie žyvuć kotki, i ci tolki jany.
«NN»: Paśla zdymak u «Muchtary» ci płanujucca niejkija novyja akciorskija ampłua?
AŁ: Heta byŭ moj pieršy dośvied zdymak u kino, ja tolki pačynaju paznavać hety šlach. Paśla zaviaršeńnia zdymak mianie doŭha nie adpuskała ŭsia hetaja historyja: rola była vielmi składanaj, bo ja hrała artystku cyrka, jakaja trahična zahinuła padčas vystupu. U bližejšy čas sieryja pavinna vyjści na telebačańni.
«NN»: U pačatku tvorčaha šlachu, kab trapić u «Spamaš», vy skinuli lišniuju vahu, a na što nikoli nie pajšli b dziela karjery?
AŁ: Ja sa zvyčajnaj siaredniestatystyčnaj biełaruskaj siamji, dzie na stale zaŭsiody byli draniki, smažanaja bulbačka, bliny, zapiakanki, piure. Była zvyčajnaj dziaŭčynaj, jakaja ŭsim cikaviłasia, naviedvała hurtok bataniki, vučyłasia viazać kručkom i prutkami. Kožnaje leta baviła ŭ vioscy.
Alena v dietstvie. Foto: 24smi.org.
15 hadoŭ tamu, kali ja pryjechała ŭ Minsk, była puchlačkaj. I mnie skazali: «Tak, u vas jość talent, ale vam nie pieraškodziła b źviarnuć uvahu na svaju fihuru». Prafiesija artysta, viadoma, nie zvodzicca tolki da źniešnich dadzienych, ale treba ŭmieć trymać siabie ŭ rukach.
Kab skinuć vahu, ja vykarystoŭvała kietadyjetu, a potym hłabalna pierahledzieła svoj racyjon. Na dadzieny momant užo hod nie jem miasa. Liču, što heta pradukt z admoŭnym enierhietyčnym indeksam.
U cełym ja chudnieła nie dziela karjery, ja tak vychoŭvała ŭ sabie volu i charaktar. Dziela karjery ja hatovaja pracavać, ekśpierymientavać, vučycca. Ale nikoli nie hatovaja pastupacca maralnymi pryncypami, pierastupać praź ludziej, padmanvać, ździajśniać podłyja ŭčynki. Ja liču, što samaje hałoŭnaje — zaŭsiody zastavacca čałaviekam i pry hetym nie zdradžvać sabie.
«NN»: Jakich muzyčnych navin bližejšym časam ad vas čakać?
AŁ: Niadaŭna vyjšła maja novaja pieśnia «U mianie jość ty» (druhaja nazva «Mužčyna majho žyćcia»). Tekst tam davoli ščyry, a Łanskaja ŭ hetym matieriale ŭžo krychu inšaja: prajaŭlaje svaju žanockaść. Mnie było dzika pryjemna pasupracoŭničać z maskoŭskim aŭtaram Maryjaj Kryłovaj, jakaja i napisała dadzienuju kampazicyju.
Tak składvajecca žyćcio, što žančyna adkazvaje za naradžeńnie i vychavańnie dziaciej, kamfort, utulnaść, harmoniju. A na plačach mužčyny lažyć adkaznaść za svajo hniazdo. U žanočych vobrazach mužčyna pavinien być Hierojem, skałoj, za jakoj možna schavacca, bo jana biare ŭsie ŭdary na siabie. Ale jakim by mocnym ni byŭ mužčyna, treba nie zabyvać svoječasova kazać «dziakuj» za jaho starańni. Hetaja pieśnia svajho rodu padziaka ad usich dziaŭčat, žančyn, maci, žonak našym mužčynam za ich ciarpieńnie, kachańnie i ŭčynki.
Jašče niekalki pytańniaŭ, jakija my adrasavali artystcy, ale jany zastalisia biez uvahi:
- Jak vy dumajecie, čamu z pradziusierskim centram «Spamaš», jaki pracuje ŭžo 15 hod, takaja situacyja? U minułym hodzie centr razžyŭsia novym budynkam, tam jość zaniatki dla dzietak, studyja, jakuju «adznačyli muzyki z Rammstein», ale, kali vyjści na vulicy i pakazać fotki vychavancaŭ vašaha centra, dać pasłuchać ich pieśni minakam, nichto nie nazavie nivodnaha imia z hetaj biełaruskaj fabryki zorak…
- Kali znoŭ zhadvać klip «Kutočak Biełarusi», jon zdymaŭsia ŭ baćkoŭskim domie Alaksandra Łukašenki ŭ Aleksandryi. Nakolki vy znachodziciesia ŭ blizkich adnosinach z Łukašenkam (paśla skandałaŭ, źviazanych ź Jeŭrafestam-2012, jon vas padtrymlivaŭ i zaklikaŭ pierad vami vybačycca, vy jość ź jaho siamjoj na supolnych fotazdymkach)?
- Šmat šumu ŭ sacsietkach narabiŭ vaš supolny fotazdymak ź cieščaj Łukašenki. Jak i kali byŭ zrobleny toj fotazdymak — raskažycie pra historyju jaho stvareńnia?
- U minułym hodzie vy vystupali na kancercie, pryśviečanym stahodździu VŁKSM. Što dla vas SSSR i kamsamoł? Ci jość u vašym rodzie raskułačanyja ci represavanyja svajaki?
- U hetym hodzie buduć śviatkavacca 101-ja ŭhodki BNR, kali arhanizatary zaprasili b vas praśpiavać «Kutočak Biełarusi» na mierapryjemstvie, pahadzilisia b?
