Makiej raspavioŭ, što samaje važnaje ŭ pryznańni viz z Rasijaj
Biełaruś i Rasija praciahvajuć abmierkavańnie pahadnieńnia ab uzajemnym pryznańni vizaŭ. Techničnyja pytańni, jakija ŭźnikli ŭ śniežni, zaraz vyrašajucca. Pra heta paviedamiŭ ministr zamiežnych spraŭ Uładzimir Makiej, piša Tut.by.
— Pahadnieńnie abmiarkoŭvajecca, niejkija rečy jašče zastalisia, — skazaŭ Makiej. — Dla nas samaje hałoŭnaje — adsutnaść kantrolu na ŭnutranaj miažy dla hramadzian trecich krain. U 1996 hodzie prezident Biełarusi i tahačasny premjer-ministr Rasii Viktar Čarnamyrdzin raśpiłavali hety šłahbaŭm, prybrali miažu pamiž našymi dziaržavami. Z taho času nijakich prablem nie było da apošniaha momantu, kali źjavilisia peŭnyja ciažkaści ź pierasiačeńniem u hramadzian trecich krain praz našu miažu. Zaraz my pracujem z našymi partniorami, — skazaŭ Makiej.
Pa słovach kiraŭnika MZS u śniežni baki nie padpisali dakumient, bo ŭźnikli «techničnyja detali, jakija zapatrabavali abmierkavańnia i z adnaho, i z druhoha boku».
— Zaraz pytańni abmiarkoŭvajucca, — adznačyŭ Makiej. — Pytańnie ŭ tym, kab na našaj sumiesnaj miažy nie było kantrolu dla hramadzian trecich krain, jak heta było i raniej, kab u nas była adzinaja mihracyjnaja karta, jakaja isnavała jašče, pa-mojmu, z 2004 hoda. Usio było narmalna, ŭličvalisia pierasiačeńnia miažy da peŭnaha momantu, kali paŭstali niejkija prablemy.
Uładzimir Makiej taksama padkreśliŭ, što ab adzinaj vizie razmovy nie idzie, razmova idzie ab uzajemnym pryznańni vizaŭ.
— U pierśpiektyvie, moža być, viedajecie, i adzinaja valuta ŭ nas kali-niebudź budzie. Zahadvać tak daloka ja nie mahu. Pakul razmova idzie ab uzajemnym pryznańni vizaŭ. I treba zrabić tak, kab heta było ŭzajemavyhadna i dla hramadzian našych krain, i naohuł dla abiedźviuch dziaržaŭ, - skazaŭ Makiej.
