Łukašenka nazvaŭ umovy pahłyblenaha sajuznaha budaŭnictva z Rasijaj i zajaviŭ: «My pavinny abaranić svoj suvierenitet i niezaležnaść»
Pra heta jon zajaviŭ siońnia na sustrečy napiaredadni 100-hodździa biełaruskaj dypłamatyčnaj słužby, na jakoj prysutničali ministry zamiežnych spraŭ, jakija ŭ rozny čas uznačalvali MZS Biełarusi, piša BIEŁTA.
«Sajuz — kali łaska. Abjadnańnie — kali łaska, ale tolki heta ludzi pavinny vyrašyć, a nie my. My nie admaŭlajemsia ni ad adnaho tezisa.
Kali niechta mnie pačynaje kazać pra abjadnańnie, to iznoŭ ža z dachu: davaj valutu ahulnuju. My nie suprać ahulnaj valuty, ale heta pavinna być ahulnaja valuta, a nie valuta Centrabanka Rasii. Pavinien być emisijny centr, stvorany na roŭnych umovach. Kali vy pryvodzicie prykład ES, dobra — na pryncypach Jeŭrasajuza, ale kab umovy byli roŭnyja i padychod», — zajaviŭ biełaruski kiraŭnik.
«Vy chočacie padatkovuju, mytnuju palityku unifikavać? Zhodzien. Taksama skazaŭ u minuły raz: ale na lepšych tradycyjach i ŭmovach, voźmiem usio lepšaje ŭ biełarusaŭ i rasijanaŭ. Ale nie tak: my — vialikija, vy — małyja, davajcie rabicie tak, jak u nas», - praciahnuŭ kiraŭnik dziaržavy.
Alaksandr Łukašenka ličyć, što ŭ niekatorych napadkach na Biełaruś niama nijakich miždziaržaŭnych abo mižnarodnych adnosin. «Usio ŭ pryvatnaściach, usio ŭ asobach, usio ŭ tym, što kamuści nie padabajecca kurs, jaki Biełaruś pravodzić. Navat nie źniešniepalityčny. A tuju ekanomiku, jakuju my budujem, toj sacyjalny ŭkład, jaki my stvarajem na pryncypach pierš za ŭsio spraviadlivaści. Hety tezis ja 20 ź lišnim hadoŭ prapavieduju. Akazvajecca, jon siońnia ŭ Rasii vielmi zapatrabavany. Tamu ŭsie banalna: kamuści chočacca panizić hradus Biełarusi ŭ Rasii. Voś i pačynajucca hetyja napadki», — adznačyŭ jon.
Jon padkreśliŭ, što na heta nieabchodna reahavać spakojna i metanakiravana. «My pavinny abaranić svoj suvierenitet i niezaležnaść. My nie suprać rasijanaŭ, palakaŭ, litoŭcaŭ. My chočam być u lubym sajuzie, ale žyć u svajoj ŭłasnaj kvatery. U nas hetaja kvatera jość. Našy susiedzi, jakija b jany ni byli, my ich nie vybirajem, i my hatovyja z usimi budavać dobryja, ciopłyja, ŭzajemavyhadnyja adnosiny», — zapeŭniŭ biełaruski kiraŭnik.
«Jak by ŭ nas ni składvalisia adnosiny z Rasijaj, my nikoli nie dazvolim, kab u nas u Biełarusi na hetaj śviatoj ziamli drenna stavilisia da rasijanaŭ. Nie tolki da ruskich. I kali kamuści chočacca sutyknuć nas - nie atrymajecca. My viedajem, jak na heta reahavać», — skazaŭ Alaksandr Łukašenka.
«Na ščaście, užo nie tolki pieršy, druhi, treci kanały tranślirujucca na ŭsiu Rasiju. Ale jość i internet. I my svoj punkt hledžańnia zaŭsiody daviadziem da ruskaha čałavieka. Da rasijanina naohuł», — adznačyŭ kiraŭnik dziaržavy.
Razam z hetym Alaksandr Łukašenka nie ličyć ciapierašni momant adnosin z Rasijaj niejkim krytyčnym abo vostrym. «Prosta pavinien skazać, što tam źjavilisia … Ci nie źjavilisia, a i byłyja kiraŭniki, jakija daŭno pracujuć, jany zaniali peŭnuju pazicyju cisku navat na ŭłasnaha prezidenta Pucina. Dumaju, heta ž nie chłopčyk, u palitycy nie pačatkoviec. I pa sustrečach ź im baču, što čałaviek nakiravany na toje, kab my ni ŭ jakim razie nie razarvali adnosiny Biełarusi i Rasii, — skazaŭ jon. — Heta vielmi niavyhadna. Heta budzie niepaŭnacenna dla jaho jak palityka, a dla mianie tym bolš. Tamu što my zaŭsiody z vami pravodzili, možna skazać, prarasiejski kurs. Prapaviedujučy šmat viektarnuju źniešniuju palityku, my zaŭsiody Rasiju vyznačali nie prosta jak našaha hałoŭnaha partniora, a jak samaja blizkaja, brackaja dziaržava, dzie žyvuć prosta našy ludzi. Tak i budzie».
