Usio dla raźvićcia pamiežnaha z Rasijaj Aršanskaha rajona: padatak 1%, pry ŭvozie abstalavańnia nie treba płacić PDV
Alaksandr Łukašenka padpisaŭ ukaz №506 «Ab raźvićci Aršanskaha rajona Viciebskaj vobłaści», jakim zaćviardžajecca prahrama raźvićcia hetaha rehijonu da 2023, paviedamiła pres-słužba kiraŭnika dziaržavy.
Orša. Fota Siarhieja Hudzilina.
U prahramu ŭklučanyja mierapryjemstvy, skiravanyja na vyrašeńnie klučavych prablem Aršanskaha rajona. Jaje metaj źjaŭlajecca stvareńnie ŭmoŭ dla kompleksnaha sacyjalna-ekanamičnaha raźvićcia rehijonu, pavyšeńnie jakaści i ŭzroŭniu žyćcia nasielnictva, stymulavańnie pradprymalnictva, rost dachodaŭ miascovaha biudžetu. Dla hetaha płanujecca realizavać šerah ekanamičnych, finansavych, padatkovych, administracyjnych i stymulujučych mier.
Tak, na terytoryi rajona ŭvodzicca śpiecyjalny režym padatkaabkładańnia: pradpryjemstvy buduć vyzvalenyja ad vypłaty PDV pry ŭvozie technałahičnaha abstalavańnia, źnižajucca staŭki padatku pry sproščanaj sistemie padatkaabkładańnia da 1%, źmianšajucca adličeńni na piensijnaje strachavańnie, a adterminoŭka (rasterminoŭka) pa vypłacie padatkaŭ budzie adbyvacca biez naličeńnia pracentaŭ za jaje vykarystańnie.
Akramia taho, u prahramie praduhledžany miery dla raźvićcia inviestycyjnaj dziejnaści. Naprykład, dla apieratyŭnaha pryniaćcia rašeńniaŭ prava na rasparadžeńnie nieefiektyŭna vykarystoŭvanaj majomaściu, što znachodzicca ŭ respublikanskaj formie ŭłasnaści, dajecca Aršanskamu rajvykankamu.
Na terytoryi rajona dazvalajecca prymianieńnie budaŭničych i techničnych normaŭ, ustanoŭlenych u ES, JEAES i KNR, z praviadzieńniem dziaržaŭnych ekśpiertyz prajektnaj dakumientacyi bieź jaje adaptacyi da dziejučych narmatyvaŭ. Pry stvareńni abo pašyreńni vytvorčaściaŭ pradpryjemstvy rajona vyzvalajucca ad pakryćcia strat sielskahaspadarčaj i lesahaspadarčaj vytvorčaściam, a taksama ad kampiensacyjnych vypłat cany vydalenych abjektaŭ raślinnaha śvietu.
Dla dadatkovaha raźniavoleńnia dziełavoj inicyjatyvy ŭ Aršanskim rajonie da 31 śniežnia 2023 hoda ŭvodzicca maratoryj na praviadzieńnie vybaračnych pravierak, a dla pazapłanavych pravierak vyznačajecca vyklučny pieralik vypadkaŭ ich praviadzieńnia. Akramia taho, praduhledžvajecca minimizacyja vypadkaŭ utrymańnia pad vartaj abvinavačanych i padazravanych u ździajśnieńni ekanamičnych złačynstvaŭ na karyść mier strymańnia, nie źviazanych ź izalacyjaj ad hramadstva.
Asobnyja pałažeńni zahada skiravanyja na materyjalnaje stymulavańnie pracy kadraŭ šlacham pryviazki ŭzroŭniu zarabotnaj płaty kiraŭnikoŭ arhanizacyj i dziaržsłužačych da vynikaŭ vykanańnia prahramy raźvićcia Aršanskaha rajona.
Praduhledžvajecca i źniaćcio abmiežavańniaŭ pa kaeficyjencie suadnosinaŭ zarabotnaj płaty kiraŭnika i siaredniaj zarpłaty pa arhanizacyi. Najbolš efiektyŭnyja miery pa raźvićci Aršanskaha rajona buduć u nastupnym pašyranyja na inšyja rehijony krainy.
