Žonka i jaje kachanak zabili muža, a vinu zvalili na alihataraŭ. Ale praŭda ŭspłyła praz 17 hadoŭ
Typovy fłarydski alihatar, fota ź Vikipiedyi
Žycharku amierykanskaha Tałachasi (Fłaryda) abvinavacili ŭ zmovie z kachankam z metaj zabojstva muža, zastrachavanaha na 1,75 miljona dalaraŭ. Pra heta paviedamlaje Associated Press.
U śniežni 2000 hoda Majk Uiljams pajšoŭ palavać kačak i nie viarnuŭsia. Bujnamaštabnaja pošukavaja apieracyja była biezvynikovaj: nie znajšli ni źnikłaha palaŭničaha, ni jaho pareštkaŭ. U palicyi zaklučyli, što jon vypaŭ z łodki i patanuŭ, a cieła źjeli alihatary.
Pa prośbie žonki, Deniz Uiljams, jaho pryznali zahinułym u vyniku niaščasnaha vypadku. Paśla hetaha joj vypłacili 1,75 miljona dalaraŭ, na jakija było zastrachavanaje jaho žyćcio. U 2005 hodzie Uiljams vyjšła zamuž za lepšaha siabra niabožčyka muža — strachavoha ahienta Brajana Vinčestara. Praź siem hadoŭ jany rasstalisia.
U 2016 hodzie Vinčestar napaŭ na Uiljams i na praciahu hadziny utrymlivaŭ jaje, pahražajučy pistaletam. Praz hod jon pryznaŭ vinu ŭ vykradańni čałavieka i byŭ prysudžany da turemnaha źniavoleńnia na 20 hadoŭ. Na nastupny dzień stała viadoma, što znojdzienyja pareštki źnikłaha 17 hadoŭ tamu Majka Uiljamsa. Test DNK paćvierdziŭ, što heta mienavita jon.
Vinčestar śćviardžaje, što jon i Deniz Uiljams byli paluboŭnikami z 1997 hoda i razam vyrašyli zabić jaje muža. Jak strachavy ahient, jon viedaŭ, što žyćcio Majka zastrachavana na bujnuju sumu — adnu z strachovak pradaŭ jon sam.
Na sudzie Vinčestar raspavioŭ, što vyšturchnuŭ Majka z łodki, piša Tallahassee Democrat. Jon spadziavaŭsia, što ciažkija bałotnyja boty zaciahnuć taho na dno, ale palaŭničy ŭčapiŭsia za pień i staŭ klikać na dapamohu. Tady strachavy ahient zastreliŭ jaho z ružža, pahruziŭ u aŭtamabil, advioz u hłuchi tupik i zakapaŭ.
U mai 2018 hoda Deniz Uiljams aryštavali i abvinavacili ŭ zabojstvie pieršaj stupieni, zmovie z metaj zabojstva i saŭdziele paśla zabojstva. Žančyna admaŭlaje ŭsie abvinavačvańni. Jaje advakat vykazaŭ zdahadku, što Vinčestar chłusić ab jaje roli ŭ złačynstvie, bo zaklučyŭ ździełku sa śledstvam, jakaja dazvoliła jamu paźbiehnuć abvinavačvańniaŭ u zabojstvie i bolš surovaha pakarańnia za vykradańnie.
