Dziaržkantrol u šoku: u Minsku stajać pustymi amal 1000 dziaržaŭnych kvater
Kamitet dziaržaŭnaha kantrolu pravieryŭ, jak ułady Minska vykarystoŭvajuć dziaržaŭny žyllovy fond.
«My ŭbačyli farmalizm i biezadkaznaść, jakija miažujuć ź biezhaspadarčaściu. Adsiul i zakanamierny vynik — štohadovy rost pustujučaha dziaržžyłfonda. Na pačatak sakavika hetaha hoda jaho kolkaść skłała 965 žyłych pamiaškańniaŭ», —
aburajecca ŭ razmovie z karespandentam «SB. Biełaruś siońnia» načalnik upraŭleńnia kantrolu za vykarystańniem dziaržaŭnaj ułasnaści KDK Mikałaj Zieńčyk.
Bolš za ŭsio novych kvater, jakija zabudoŭščyki biaspłatna pieradavali Minharvykankamu. Ich 553. Siudy pavinny byli pierasialić ludziej z damoŭ pad znos. Adnak nasamreč, adznačajuć u KDK, patreby ŭ takich abjomach žyłpłoščy mienavita dla hetaj mety nie było: «Niahledziačy na heta, Minharvykankam nie prymaŭ naležnych mier, kab vykarystoŭvać kvatery efiektyŭna, naprykład, dla skaračeńnia čarhi na palapšeńnie žyllovych umovaŭ».
Čatyrochpakajoŭka na Dzianisaŭskaj staić pustaja z 2015 hoda.
Krychu bolš za tracinu pustujučaha dziaržžyłfonda (32%) — druhasnaje, arendnaje žyllo. Takich kvater 308. Choć Žyllovym kodeksam vystaŭlena žorstkaje patrabavańnie pa zasialeńni žylla na praciahu adnaho miesiaca paśla jaho vyzvaleńnia. U Minsku hetaja norma, jak bačym, nie vykonvałasia, a asobnyja žyłpłoščy pustavali bolš za 10 hadoŭ.
Za ŭtrymańnie pustych žyłych mietraŭ u horadzie Minharvykankam na praciahu 2015 — 2017 spłaciŭ 1 miljon rubloŭ.
