U Minsku zakryłasia pryvatnaja aŭtaškoła «Sihnał», kala 100 kursantaŭ zastalisia ni z čym
Jak stała viadoma «Našaj Nivie», kala 100 čałaviek, jakija zajmalisia ŭ pryvatnaj aŭtaškole «Sihnał», nie zmohuć u najbližejšy čas atrymać paśviedčańni kiroŭcy. Dy i viartać hrošy za niaskončanaje navučańnie — pa 700 rubloŭ z čałavieka — im nichto nie źbirajecca.
«Učora [4 śniežnia] u nas mieŭsia być zaniatak, a vykładčyk teoryi kaža: maŭlaŭ, ničoha nie budzie — učora škoła była likvidavanaja. Voś vam papiery, padpišycie, što vy zabrali svaje miedycynskija daviedki. Viadoma, ludzi pačali pytacca pra kampiensacyju hrošaj. Što skazaŭ vykładčyk? «Ujavicie, što vy zamovili ŭ kramie na zaŭtra 50 butelek harełki, a zapłacili siońnia. Prychodzicie na nastupny dzień — a krama zakryłasia. Vam viernuć hrošy?». Jon skazaŭ, što šansaŭ viarnuć amal niama. Maŭlaŭ, voś vam numar likvidatara, zvanicie jamu i vyśviatlajcie», — paviedamiŭ «Našaj Nivie» čytač.
Pryvatnaja aŭtaškoła «Sihnał» była zasnavanaja ŭ 2005 hodzie i mieła siarednija pakazčyki paśpiachovaści zdadzienych ekzamienaŭ.
Što ŭ ich tam narabiłasia?
U «Sihnale» pryznajuć, što praces likvidacyi zapuščany i zaniatki bolš nie pravodziacca, maŭlaŭ, astatnija pytańni — da likvidataraŭ.
Likviduje «Sihnał» kampanija «Ze End» (u pierakładzie z anhlijskaj movy — «Kaniec»).
Jak patłumačyŭ juryskonsult hetaj kampanii, «Sihnał» likvidujecca nie pa rašeńni suda, a pa rašeńni ŭłaśnika.
«U hetym vypadku rašeńnie pryniaŭ ułaśnik — jany nie bačać sensu ŭ dalejšaj dziejnaści. Viadoma, ludziej cikavić, ci viernuć im hrošy. Im treba napisać patrabavańnie na imia likvidatara z tłumačeńniem, što za zapazyčanaść pierad imi, prykłaści kvitok ab apłacie. Zhodna z zakonam za dva miesiacy budzie składzieny śpis takich asob i arhanizacyj, pierad jakimi maje abaviazki «Sihnał». Budzie taksama acenieny bałans pradpryjemstva, jahonyja pasivy i aktyvy. I potym, zhodna z čarhoj, zapazyčanaść budzie pahašacca», — skazali nam.
Juryst Siarhiej Zikracki tłumačyć, što šansy viarnuć srodki vyhladajuć niapeŭnymi.
«Padčas likvidacyi składajecca śpis kredytoraŭ i śpis majomaści, ź jakoj možna vypłačvać kampiensacyju. Kali hetaj majomaści nie chopić, to tady ŭžo hetaja arhanizacyja idzie ŭ sud i abviaščaje siabie bankrutam.
Kali sud prychodzić da vysnovy, što bankructva nie naŭmysnaje, to tady ničoha nikomu nie viernuć», — kaža Zikracki.
«U zakonie jość paniaćcie «machlarstva» — zavałodańnie čužoj majomaściu šlacham złaŭžyvańnia davieram. Kali kiraŭnictva firmy zaklučała novyja ŭhody ŭžo viedajučy, što nie zmoža ich vykanać, a tolki dla taho, kab raźličycca z častkaj zapazyčanaściaŭ i na etapie padpisvańnia kantraktu nie mieła namier jaho vykonvać, to heta machlarstva. Ale kali takoje i było, to heta ciažka dakazać, z hetym musiać raźbiracca adpaviednyja orhany», — padsumavaŭ juryst.
U samoj aŭtaškole, darečy, nam skazali, što «zakon nie praduhledžvaje mahčymaści spynić navučańnie i praciahnuć jaho ŭ inšym miescy». Vychodzić, što padmanutym ludziam treba budzie pačynać usio spačatku.