Ryžskaja Duma pryznała biełarusa Viačku Cieleša čałaviekam hoda za ŭniosak u adukacyju
Cyrymonija ŭznaharodžańnia Viački Cieleša, fota Peterysa Zalitysa
Suzasnavalnik Tavarystva biełaruskaj kultury «Śvitanak» u Łatvii, kiraŭnik abjadnańnia biełarusaŭ-mastakoŭ Bałtyi «Maju honar» Viačka Cieleš uhanaravany Dumaj (haradkoj radaj) Ryhi, piša Radyjo Svaboda.
Mastak i vykładčyk atrymaŭ pryz hodu ŭ naminacyi «Za šmathadovy ŭniosak u adukacyju», uznaharodu ŭručyła staršynia Kamitetu pa adukacyi, kultury i sportu Ryskaj Dumy Ejženija Ałdermane.
25 vieraśnia Viačka Cieleš adznačyŭ 80 hod. Da jubileju była prymierkavanaja persanalnaja vystava «Hadoŭ datyknieńnie», jakaja achapiła ŭvieś peryjad jahonaj tvorčaści — ad studenctva da stałaści.
Cieleš byŭ arhanizataram i dyrektaram pieršaj biełaruskaj škoły ŭ Ryzie, byŭ u Kansultacyjnaj radzie pry ŭsich prezydentach Łatvii, abaraniaŭ intaresy biełarusaŭ. Jahonyja vysiłki adznačanyja najvyšejšaj dziaržaŭnaj uznaharody Łatvii — ordenam Troch Zorak.
«Ja ŭsio žyćcio staju pad našym histaryčnym ściaham, heta hałoŭnaje. Ja nie kryču pra heta, nie razmachvaju rukami; maja meta — źjadnać biełarusaŭ na nacyjanalnym hruncie. Tak było zaŭždy. Nichto nie asprečyć, što ja šmat rabiŭ i praciahvaju rabić na karyść Baćkaŭščyny», — zajaviŭ mastak u interviju Svabodzie z nahody svajho jubileju.
Viačka Cieleš naradziŭsia 25 vieraśnia 1938 hodu ŭ Krasnym Siale (ciapier pasiołak Krasnasielski Vaŭkavyskaha rajonu) Horadzienskaha vajavodztva. Mastak, historyk, piśmieńnik, siabra Sajuzu mastakoŭ Biełarusi i Łatvii.
U 20-hadovym uzroście vypraviŭsia ŭ Łatviju, pracavaŭ ślesaram, viečarami naviedvaŭ mastackuju studyju. U 1975-m skončyŭ žyvapisna-pedahahičnaje adździaleńnie Łatvijskaj dziaržaŭnaj akademii mastactvaŭ, paźniej atrymaŭ stupień mahistra mastactva. Byŭ dacentam katedry kultury i mastactva Instytutu menedžmentu infarmacyjnych systemaŭ u Ryzie.
Pracuje ŭ roznych žanrach stankovaha žyvapisu i hrafiki. Aŭtar partretaŭ i ekślibrysaŭ biełaruskich i łatyskich dziejačaŭ: Franciška Skaryny, Vincenta Dunina-Marcinkieviča, Maksima Bahdanoviča, Janki Kupały, Kastusia Jezavitava, Zośki Vieras, Uładzimiera Karatkieviča, Adama Maldzisa, Janisa Rajnisa.
Adzin z samych viadomych eŭrapiejskich filakartystaŭ: jahony albom «Harady Biełarusi na starych paštoŭkach» na biełaruskaj i anhielskaj movach vytrymaŭ niekalki pieravydańniaŭ.
Čytajcie: Viačka Cieleš prezientavaŭ «Harady Biełarusi na starych paštoŭkach» i knihu-radavod dla svajakoŭ FOTA
