Pryhody Pakatuna i Paležuna, miemuary haspadara Ščorsaŭ, fantastyka — knižnyja navinki «Halijafaŭ»
U vydaviectvie «Halijafy» vyjšła niekalki vartych uvahi knih: miemuary, albom z fota 1917-ha, zbornik najlepšych tvoraŭ Juryja Stankieviča, fantastyka…
Chroniki siamji Chraptovičaŭ-Bucienievych
Michaił Bucienieŭ naradziŭsia ŭ 1919 hodzie ŭ Jałcie, kudy baćki jaho źjechali z Maskvy paśla revalucyi. Jamu nie było hoda, kali jaho siamja źjechała ŭ Aŭstryju praz Kanstancinopal; paźniej pierajechali ŭ Francyju, a ŭ 1934 pierabralisia ŭ Zachodniuju Biełaruś, u familny majontak Ščorsy. U miemuarach, praz bahaty na padziei los adnoj siamji možna pabačyć historyju niaprostaha XX stahodździa.
Doŭbarčyki z Babrujskaj krepaści
Albom, vydadzieny historykami Elžbietaj Inieŭskaj i Iharam Mielnikavym, raspaviadaje pra padziei 1917 u Babrujsaj krepaści, dzie byŭ raskvataravany I Polski korpus hienierała Juzafa Doŭbar-Muśnickaha.
Historyja advažnych žaŭnieraŭ-″doŭbarčykaŭ″ — heta taksama historyja Babrujska, u jakuju ŭpisalisia imiony takich hierojaŭ, jak Uładzisłaŭ Anders, Jan Skaryna i budučy hieroj abarony Bresckaj krepaści — Kanstancin Plisoŭski.
Sałdaty hienierała Doŭbara paźniej zmahalisia z nacystami na mnohich frantach Druhoj suśvietnaj vajny.
Albom azdobleny archiŭnymi fotazdymkami.
Dabradziei i harmidar kvantavaj litaratury
Ci čuli vy, što ŭsie vydumanyja suśviety isnujuć nasamreč? I nie tolki isnujuć, ale i dapamahajuć piśmieńnikam, čytačam, a najpierš amataram kazak i fentezi.
Ci viadoma vam, što pobač z nami žyvuć paralelnyja cyvilizacyi razumnych žyvioł? Žurnalist Tamaš Jan taksama nie viedaŭ, pakul nie ŭłupiŭsia hałavoj u pień i nie trapiŭ u karčmu «Chałodnyja nohi» kala mohiłak.
Anamalnyja źjavy, vaŭkałaki, tahaśvietnyja pačvary pad abliččam vabnych pryhažuń dy inšaje ŭ novym zborniku biełaruskaha prazaika Alesia Byčkoŭskaha «Dabradziei i harmidar kvantavaj litaratury».
Sudumańnie
Napisanaja leksikaj biez mužčynskaha i žanockaha rodu ŭ adzinočnym liku, apovieść Mikoły Kaladnaha maluje dziŭnyja ŭzajemadačynieńni i kaśmičnyja pryhody razumnych istotaŭ, pakazvaje cikavy fienamienalny śviet biaspłocievych stvareńniaŭ.
Biesapatam
Knihu «Biesapatam» prazaika Juryja Stankieviča składajuć napisanyja ŭ roznyja hady raman «Lubić noč — prava pacukoŭ», apovieści «Apładnieńnie jołupa», «Łaviec śviatła poŭni», «Biesapatam», a taksama niekalki apaviadańniaŭ.
Tvory vyklikali vialiki rezanans. Dla prazaičnych rečaŭ, pradstaŭlenych u knizie, charakternyja napružany siužet, aleharyčnaść, niaprostyja, časam šokavyja situacyi i razvahi pra budučyniu.
Pakatun i Palažun
Pakatun i Palažun — dźvie kazačnyja istoty, jakija choć i nie padobnyja da ludziej, ale dziejničajuć i adčuvajuć, jak my z vami. Charaktary ŭ ich vielmi roznyja: Pakatun — enierhičny, ryzykoŭny, na miescy jamu nijak nie siadzicca, a voś Palažun — strymany, pamiarkoŭny, časam trochi bajaźlivy. Jak u lubych adnosinach, u ich byvajuć i imhnieńni piaščoty, i supolnyja hulni, i adkryćci, ale nie abychodzicca i biez svarak, nieparazumieńniaŭ ci razdražnieńnia. U kancy jany naohuł źbirajucca raźvitacca nazaŭždy, ale ci zmohuć?
Piatnaccać paetyčnych historyj pra radaści i pakuty supolnaści. Historyi z žyćcia, jakija dapamahajuć navučycca nazyvać roznyja stany i pačućci, što byvajuć pamiž ludźmi.
Dom cikaŭnych kazak
Kazki, niby čaroŭnyja istoty, padarožničajuć pa śviecie i čas ad času dorać kamuści dziva. Niejak jany ź cikaŭnaści naviedali adzin dom — i z žycharami hetaha doma zdarylisia sapraŭdnyja, chaj i maleńkija, pryhody…
«Dom cikaŭnych kazak» — heta składanka karotkich historyj piśmieńnicy Nadziei Jasminskaj z šykoŭnymi ilustracyjami mastački Aleny Sacuty. Hieroi ŭ joj sustrakajuć niezvyčajnych haściej, prychodziać na dapamohu dziŭnym nieznajomcam i navat apynajucca ŭ roznych cikavych miescach, nie pakidajučy svajho pakoja.
Knižka pryznačana dla čytačoŭ małodšaha školnaha vieku.
Nabyć knihi možna na sajcie halijafy.by i ŭ kniharni vydaviectva na Niamizie, 3 (cokalny pavierch, boks 47).
«Halijafy» — niezaležnaje vydaviectva, zasnavanaje ŭ 2007 hodzie. Śpiecyjalizujecca na vydańni mastackaj litaratury sučasnych aŭtaraŭ, dziciačych knih na biełaruskaj movie i knih, jakija daśledujuć z roznych bakoŭ sučasnuju Biełaruś.
Sačycie za navinami vydaviectva ŭ fejsbuku, ukantakcie i instahramie.