Padazravanych u kryvavym zabojstvie siamji ź dziećmi zatrymali druhi raz: 11 hadoŭ tamu ich apraŭdali
Siłaviki zatrymali padazravanych u kryvavym zabojstvie, jakoje adbyłosia ŭ 2005 hodzie ŭ Białynickim rajonie, paviedamlaje mahiloŭski partał 6tv.by.
Tady žorstka zabili cełuju siamju: zahinuli čaćviora darosłych i dvoje dziaciej. Pryčym padazravanych zatrymlivajuć užo ŭ druhi raz. 13 hadoŭ tamu ich navat sudzili — ale pryznali nievinavatymi.
Samo zabojstva adbyłosia ŭ vioscy Vialikaja Maščanica. Tady znajšli zabitymi ŭ svaim domie šaściarych miascovych žycharoŭ. Pa vioscy chadzili čutki, što siamja niadaŭna pradała kvateru i maje hrošy. Maŭlaŭ, heta i stała pryčynaj zabojstva.
Praź dzień zatrymali piaciarych maładych ludziej va ŭzroście ad 18 da 24 hadoŭ z hetaj ža vioski, im nieŭzabavie było pradjaŭlena abvinavačvańnie ŭ zabojstvie. Rasśledavańnie pa spravie ciahnułasia amal paŭtara hoda, paśla 11 miesiacaŭ u Mahiloŭskim abłasnym sudzie pad staršynstvam sudździ Michaiła Mielnikava išoŭ sudovy praces.
Pa vynikach sudovaha razhladu prakuror patrabavaŭ dla dvuch padazravanych rasstreł, dla troch inšych — pažyćciovaje źniavoleńnie. Ale ž u 2007 hodzie kalehija Mahiloŭskaha abłasnoha suda apraŭdała padazravanych — nie chapiła dokazaŭ viny.
Adzin z padsudnych byŭ vyzvaleny z-pad varty ŭ zale suda, astatnija čaćviora byli pakaranyja terminami źniavoleńnia ad 4 da 10 hadoŭ za inšyja złačynstvy: kradziažy, seksualnyja dačynieńni ź niepaŭnaletnimi, sprobu zhvałtavańnia, chulihanstva.
Ciapier ža traich z toj piaciorki znoŭ uziali pad vartu. Jany nibyta znachodziacca ŭ Minsku ŭ IČU. Jašče dvaich pakul nie znajšli.
Taksama ŭ ahraharadku Vialikaja Maščanica byli praviedzieny vobšuki ŭ niekatorych sa svajakoŭ zatrymanych. Pa słovach miascovych žycharoŭ, u pryvatnych hutarkach supracoŭniki milicyi tłumačyli, što padstavaj dla zatrymańnia i vobšukaŭ stali dadzienyja, atrymanyja z dapamohaj najnoŭšych technałohij pry čarhovym daśledavańni rečaŭ ź miesca zdareńnia.
Mahiloŭskija śledčyja paćvierdzili «Našaj Nivie», što spravu zaviali iznoŭ, ale padrabiaznaściaŭ nie viedajuć, bo raśledavańniem zajmajecca Centralny aparat SK. U Centralnym aparacie pakul nie prakamientavali situacyju.
