Łukašenka: Nie treba Polščy stvarać lišnija bazy, bo my z rasijanami taksama budziem vymušanyja niešta raźmiaščać
Padčas sustrečy z žycharami haradskoha pasiołka Bałbasava ŭ Aršanskim rajonie Alaksandr Łukašenka adznačyŭ vyklučna miralubivuju palityku biełaruskaj dziaržavy i naroda, pieradaje BIEŁTA.
«My — mirnyja ludzi, nie žadajem vajny. My nie bahatyja, ale nikoha nie prosim. My sami svajo ščaście zarobim. Kali budziem varušycca, my ŭsio zrobim sami. Ja ŭžo skazaŭ, što dziasiatki i sotni hadoŭ pieramovaŭ — heta lepš za adzin dzień vajny. Nie daj boh. Ja viedaju pa hetych haračych kropkach. Dla hetaha (mirnaha žyćcia. — Zaŭvaha BiełTA) my pavinny być jak adzinaje cełaje, bačyć svaje mety, žyć tak, jak ličym patrebnym», — skazaŭ kiraŭnik dziaržavy.
«Nam čužoha nie treba. U nas siaredniaja pa jeŭrapiejskich mierkach dziaržava. My ŭ samym centry Jeŭropy i heta cenim», — padkreśliŭ biełaruski lidar.
Alaksandr Łukašenka, u pryvatnaści, źviarnuŭ uvahu na tranzitnaje značeńnie Biełarusi. «Vystupajučy pierad pradstaŭnikami Zachadu na Miunchienskaj kanfierencyi (sustreča ŭ Minsku asnoŭnaj hrupy Miunchienskaj kanfierencyi pa biaśpiecy. — Zaŭvaha BiełTA), ja im kazaŭ: šanujcie Biełaruś, nie treba suprać nas sankcyi ŭvodzić. I narkata, i bandytyzm, i jadziernyja elemienty, i niezakonnaja mihracyja — usio praz nas idzie na Zachad. My ich łovim, adłoŭlivajem za ŭłasny košt», — adznačyŭ kiraŭnik dziaržavy.
«Siońnia narešcie jany zrazumieli, u čym vartaść hetaha kavałka ziamli ŭ centry Jeŭropy. Nie tolki jany. Amierykancy vielmi daloka — taksama acanili. Ja ŭžo nie kažu pra starejšaha brata (Rasiju. — Zaŭvaha BiełTA)», — skazaŭ Alaksandr Łukašenka.
Havoračy ab biełaruskaj źniešniepalityčnaj linii, Łukašenka padkreśliŭ, što jana zychodzić ad žyćcia: «Ja ničoha nie prydumaŭ. Z susiedziami treba žyć dobra, čaho nam ź imi svarycca».
U suviazi z hetym jon zhadaŭ ab prapanovach pabudavać u Polščy amierykanskuju vajskovuju bazu.
«Ja ministru zamiežnych spraŭ skazaŭ — jon vystupaŭ u nas u Minsku: my z vami vajavać nie źbirajemsia. Tamu nie treba stvarać dadatkovyja bazy. U advarotnym vypadku my z rasijanami pavinny budziem adkazvać. Značyć, my budziem vymušanyja niešta raźmiaščać, kab vam procidziejničać», — zajaviŭ kiraŭnik Biełarusi.
