U Viciebsku pierad pryjezdam Łukašenki za noč zbudavali viertalotnuju placoŭku FOTA
U piatnicu, 2 listapada, u Viciebsku čakajuć prezidenta. Jon musić pabyvać u harpasiołku Bałbasava pad Oršaj, a ŭ abłasnym centry adkryje madernizavany futravy kambinat i naviedaje fabryku-bankrut KIM, piša tut.by.
U rajonie pasiołka Tarny i vulicy Maksima Horkaha, dzie znachodziacca hetyja pradpryjemstvy, idzie aŭralnaja padrychtoŭka da sustrečy pieršaj asoby. Tut zbudavali navat placoŭku dla pasadki viertalota.
«Placoŭku na byłym aŭtadromie ŭ pasiołku Tarnym pačali budavać u noč na čaćvier, 1 listapada», - raspaviadaje čytač tut.by.
- Siońnia za adnu noč zakatali ŭ asfalt placoŭku byłoha aŭtadroma, - paviedamiŭ miascovy žychar, jaki prosić jaho nie nazyvać. - Adzin z rabočych vykazaŭ zdahadku, što, napeŭna, tut siadzie viertalot prezidenta. Ranicaj tut pracavali nie mienš za 30 adzinak techniki i ledź nie sotnia ludziej.
Były aŭtadrom ŭ Zialonym haradku, pamiž vulicaj 1-j Zarečnaj i zavułkam Prybiarežnym, byŭ zakinuty hadoŭ 10 tamu. Ale mienš čym za sutki tut usio źmianiłasia:
- Da novaj placoŭki, jakaja źjaviłasia paśla sioletniaj nočy, ciapier z usich bakoŭ pravodziać darohu. A raniej tut byli hravijka i raźbity asfalt. Ale ŭčora pakłali novaje asfaltavaje pakryćcio.
- Placoŭku dla mahčymaj pasadki viertalota siońnia vyprabavali. Ciapier usio vakoł farbujuć i dobraŭparadkoŭvajuć, - paviedamiŭ miascovy žychar.