Što my słuchali ŭ kastryčniku: samyja značnyja muzyčnyja albomy miesiaca
U padborcy najlepšych albomaŭ druhoha miesiaca vosieni znajšłosia miesca ŭsim: błek-mietału i tancavalnaj muzycy, śpievam biełaruskaha Paleśsia i dabstepavym ekśpierymientam. Pahladzicie, što my dla vas sabrali!
Raźbitaje Serca Pacana — Karniapłody lubvi
Piaty albom kultavaha biełaruskaha hurta. Muzyki pastaralisia zrabić jaho raznapłanavym, prypraviŭšy hučańnie notkami rehi, fanku i panku.
U čarhovy raz pryznajomsia u lubovi da RSP i raim vam zrabić toje ž samaje!
Behemoth — I Loved You at Your Darkest
Kali na baku ciemry jość niešta nievierahodnaje, to muzyka Behemoth dakładna ŭvachodzić u hety śpis.
Polskija błek-mietalisty vydali čarhovy vydatny albom. Kožnaja kampazicyja pieradaje spakusu ćmianaha boku, jaki pakrysie pieraciahvaje ciabie, pakidajučy ŭ dušy ŭsio mienš śviatła.
Twenty One Pilots — Trench
U albomie Trench muzyki znoŭ stvaryli ceły suśviet sa svaim siužetam, jaki raskryvajecca z kožnym trekam. Raniej heta była baraćba dabra sa złom unutry čałavieka, u novym albomie Twenty One Pilots jość ceły horad Dema, dzie dzieviać tyranaŭ-jepiskapaŭ utrymlivajuć ludziej, pa inšy bok — paŭstancy, jakija zdoleli źbiehčy i ciapier sprabujuć vyzvalić astatnich.
Słuchajcie, sprabujcie zastacca ŭ žyvych u horadzie Dema.
Parcels — Parcels
Bierlinski hurt, jaki byŭ zasnavany ŭ Aŭstralii, vydaŭ svoj debiutny albom.
Letaś hurt vydaŭ sumiesny trek ź lehiendarnymi Daft Punk, i, sapraŭdy, u hučańni Parcels možna znajści niešta da bolu znajomaje.
Tom Morello — The Atlas Underground
Lehiendarny hitaryst Rage Against The Machine zapisaŭ vielmi niezvyčajny solny albom. Da supracy Tom Mareła zaprasiŭ pradstaŭnikoŭ absalutna roznych muzyčnych žanraŭ, z čaho atrymałasia niešta kštałtu histaryčnaha zrezu taho, što modna słuchać siońnia.
Vuraj — Lito
«Lito» — heta bieražliva sabranyja, pieraasensavanyja i litaralna nanoŭ stvoranyja kalandarna-abradavyja pieśni biełaruskaha Paleśsia.
Siaržuk Doŭhušaŭ i Vuraj na praciahu 4 hadoŭ šukali ich u ekśpiedycyjach, znachodzili i nadavali kožnaj svajo admietnaje «vurajskaje» hučańnie.
Disturbed — Evolution
Siomy albom amierykanskich mietalistaŭ, jaki jany pryśviacili pamiaci Čestara Bieninhtana dy Vini Poła.
Na stvareńnie płytki muzykaŭ natchniała toje, što jany słuchali ŭ svaim dziacinstvie, tamu Evolution u kantekście raźvićcia Disturbed — heta viartańnie da vytokaŭ.
Tesla Boy — Remedy
Pieršy albom rasijskaha elektronnaha hurta za apošnija 5 hod.
Remedy zapisvaŭsia ŭ Maskvie, Łondanie, Prazie, Sankt-Pieciarburhu i navat na vostravie Bali. Zapis u Łondanie supaŭ z atručvańniem Skrypaloŭ, i lidar Tesla Boy Anton Sievidaŭ (jaki naradziŭsia ŭ Minsku i maje biełaruskija karani) pryznavaŭsia, što było adčuvańnie, što ŭvieś śviet zvarjacieŭ.
I tolki atmaśfiera lubovi dapamahła zrabić albom takim, jakim jon u vyniku atrymaŭsia.
Łuna — Zakołdovannyje sny
U pačatku hoda ŭkrainskaja śpiavačka paabiacała praciah alboma «Ostrov svobody», ale zamiest jaho vyjšli «Zakołdovannyje sny». Heta sapraŭdy viadźmarskija pieśni z vyvieranym hukam i bałansam nastalhičnaha i sučasnaha.
Sama śpiavačka padała albom jak historyju kachańnia, apisanuju ŭ 11 pieśniach.
Robyn — Honey
Lehienda pop-muzyki viarnułasia, i viarnułasia tryumfalna.
Pieršaja za vosiem hadoŭ płytka Robin — heta toje, jak hučyć seksualnaść u pop-muzycy.
A što vy słuchali ŭ kastryčniku? Pišycie ŭ kamientarach!