«33-hadovy niavińnik», «seks biez abaviazkaŭ» i «pieraviadzi mnie hrošy». Jak ja praviała miesiac na sajcie znajomstvaŭ
Miesiac tamu ja dumała-dumała i advažyłasia na ekśpierymient — pravieści miesiac na sajcie znajomstvaŭ «Tabar.ru».
Hety sajt isnuje ad 2007 hoda, im karystajucca kala 14 miljonaŭ čałaviek. Adnačasova anłajn tam znachodziacca kala 30 000 karystalnikaŭ. Hieahrafija sajta — u asnoŭnym Biełaruś, Rasija i Ukraina, ale ŭ pošuku možna vybrać Italiju ci, naprykład, Francyju. Ale jak usurjoz stavicca da taho, što francuz nazyvaje siabie Achłamonam, a italjaniec Intymam-1, — nie viedaju.
Dla siabie vyrašyła nie ihnoryć nikoha. Zapoŭniła ankietu, raźmiaściła svajo sapraŭdnaje fota, padpisała imia. Z uzrostam krychu schitryła, ale tolki krychu. Na paviedamleńni adkazvaju ŭsim.
Meta ekśpierymientu — adkazać na pytańnie: ci možna sustreć na takim sajcie kali nie kachańnie ŭsiaho žyćcia, to chacia b siabra. Paniesłasia!
33-hadovy «niavińnik» i žanaty mužčyna, jakija ź pieršaha paviedamleńnia jechali da mianie
Na sajcie znajomstvaŭ, jak akazałasia, siadziać vielmi ścipłyja chłopcy, jakija ŭ svaich paviedamleńniach dalej za słova «pryviet» nie zachodziać. Adnak sustrakajucca i bolš nachabnyja ekzemplary.
Saša, 28 hadoŭ.
Adrazu napisaŭ, što choča sa mnoj sustrecca. I adrazu ž pryznaŭsia, što jon žanaty. Na majo pytańnie, dzie jon choča sustrecca, adkazaŭ: «Idzi ŭ duš, ja chutka da ciabie zajedu».
Ci treba kazać, što paśla hetaha pajšoŭ jon — nie ŭ duš, a ŭ čorny śpis.
Anton, 33 hady.
Nie viedaju, ci heta razvod dla łachušak, ale Anton adrazu zapytaŭsia, ci cikavić mianie seks z cnatlivym. I raskazaŭ svaju historyju pra toje, što niejak nie załadziłasia ŭ jaho z žančynami, to vučoba, to praca. Zrešty, jaho kranalnaja historyja nie kranuła ni razu. Nie kranuła tamu, što ja prosta ŭ jaje nie pavieryła. Pierapiska skončyłasia jaho paviedamleńniem: «Nu, kali pieradumaješ, daj znać».
Siarhiej, 28 hadoŭ.
Siarhiej doŭha nie razmaŭlaŭ. Zaprasiŭ u kino i paprasiŭ numar telefona. Pahadziłasia. Čakaju, što budzie dalej.
(Prajšoŭ miesiac. Adnojčy atrymała ad jaho prymityŭny vieršyk pra dobruju ranicu. Ni razu, na ščaście, toj Siarhiej tak i nie pazvaniŭ.)
U asnoŭnym chłopcy na sajcie znajomstvaŭ nie hatovyja da sustreč u kino abo kaviarni. Pieravažna zaprašajuć da siabie. Kali adkazvaješ, što nikudy nie pajedzieš i što chacieła b sustrecca ŭ kaviarni, adkazvajuć: «Nie hani! Pryjedzieš!»
Inšyja nastojliva prosiać numar telefona. Nie daju, ščyra kažučy, nie chaču zaśmiečvać svoj efir razmovami, jakija ničym nie skončacca. Zatoje stała źviartać uvahu na statusy chłopcaŭ.
Mudraść z sajta znajomstvaŭ
Arfahrafija i punktuacyja zachavanyja.
«Zdorovo najti toho čiełovieka, kotoromu možno utknuťsia v plečo i poniať, čto vsie chorošo». Valera, 36 hadoŭ
«Tolko charošij sieks sbližajet ludiej na vieka». Vital, 37 hadoŭ
«Chorošo, kohda jesť čiełoviek kotoroho ty bolšie, čiem silno, a on tiebia — silnieje, čiem očień». Dzima, 30 hadoŭ
«Vnutri každoj dievuški živiet martyška!». Siarhiej 32, hady.
«Naša žizń eto postojannyj vybor: komu dovieriť svoj biezymiannyj palec, a komu — sriednij». Alaksiej, 34 hady
«V junosti ja połahał, čto sieks — samoje hłavnoje v žiźni. Tiepieŕ ja stał staršie i ubiediłsia, čto tak ono i jesť!». Džoni, 43 hady
«Udivitielnyj sajt…u žienŝin — illuzija vostriebovannosti, u mužčin — illuzija vybora». Andrej, 39 hadoŭ
«Pomni, samyj sachar na dnie». Michaił, 29 hadoŭ
«Dievuška, kotoruju mama naučiła jesť banan łožkoj, niesčastliva v siemiejnoj žiźni». Ivan, 38 hadoŭ
Nastupny tydzień taksama ničym pazityŭnym nie vyznačyŭsia. Adnyja «mańjaki», jakija ŭžo ŭ druhim paviedamleńni prapanoŭvali intymnuju blizkaść. Prapanoŭvali sustreć z pracy, zvali na kavu, a paśla majho adkazu «Dobra, davajcie», pierapytvalisia: «A seks dakładna budzie?»
Illa, 26 hadoŭ:
Hety Illa ŭčyniŭ mnie sapraŭdnuju isteryku.
Piša, što choča pryjechać, ubačycca. Kažu: ok, u mianie budzie volnaja hadzinka ŭ subotu z 18.00 da 19.00.
Dalej cytata: «Nie zrazumieŭ! A dzie ja načavać budu? Nie fih mnie rabić, jechać usiaho na hadzinu, ja mahu na ciabie i pa vajbiery prosta pahladzieć. Ty niejkaja dziŭnaja! Muža tut sabie šukaješ, chłopca? Dyk darma marnuješ čas! Ja pryjedu, kali USIO budzie. A tak, daśvidos!»
Ok, «daśvidos».
Kali kazać pra pytańni, jakija zadajuć čaściej za ŭsio i jakija asabliva razdražniajuć, to heta takija: «Z kim žyvieš?», «Što šukaješ na sajcie?», «Daj spasyłku na staronku «Ukantakcie».
Čym dalej u les, tym strašniej stanovicca. Usio bolš prapanoŭ kankretna pieraspać za hrošy abo stać paluboŭnicaj.
Andrej, 42 hady:
«Možam sustrakacca na ŭzajemavyhadnych umovach?» — pytajecca ŭ mianie intelihientny ačkaryk.
«Jakija heta takija vyhadnyja?» — pytajusia.
«Ty sa mnoj śpiš, a ja tabie hrošyki».
Seks z saboj «Andrej, 42» acaniŭ u 50 rubloŭ.
Admoviłasia. Napisaŭ: «Zrazumiej i daruj».
10 kastryčnika ŭpieršyniu pahadziłasia na sustreču. Chłopiec Saša jechaŭ ź Minska ŭ Maładziečna, prapanavaŭ padvieźci. Usiu darohu razmaŭlali, było cikava i nienapružna. Nazaŭtra sustrelisia papić kavy. Na treciaj sustrečy Saša pryznaŭsia, što jaho zavuć zusim nie Saša. Napružyłasia i čakała padvochu. Zrešty, padvoch siabie doŭha čakać nie prymusiŭ. Na nastupny dzień, paśla na nastupny tydzień «Saša» pieryjadyčna pisaŭ, što sumuje i choča sustrecca, ale niedzie ŭ adjeździe i ŭ jaho nie atrymlivajecca. Tak hetaja pierapiska praciahvajecca i siońnia. Zrešty, numar telefona jon tak i nie spytaŭsia.
Pad kaniec miesiaca zrabiła vysnovu, što na sajcie znajomstvaŭ praŭdu pra siabie raskazvać nie śpiašajucca.
Padmanvajuć va ŭsim: pačynajučy ad uzrostu i siamiejnaha stanovišča da najaŭnaści dziaciej. Samyja ščyryja pryznajucca ŭ tym, što šukajuć tolki seks. Samyja dziŭnyja šluć kožnuju ranicu vieršyki, žadajuć dobraj nočy ci dobraha dnia, akramia hetaha bolš ničoha nie pišuć.
Nie dumaju, što niešta źmienicca za apošni tydzień ekśpierymientu. Ale kropku pastavić treba. I tut zdaryŭsia Anton…
Anton, 28.
Anton, biezumoŭna, dyjamient u majoj kalekcyi! Pryhožy, viasioły, cikavy. Čempijon krainy pa adnym ź vidaŭ sportu. Sustrelisia ź im u kaviarni. Razmaŭlali, dureli. Abmianialisia spasyłkami na staronki Ukantakcie.
Na fota ŭ sacyjalnaj sietcy Anton u kaściumie, jaki pryniata nazyvać šlubnym. Dy i fota, vidać, prafiesijnaje.
«Ty što, žanaty?» — pytajusia.
«Žanaty». Adkazvaje mnie Anton 18 kastryčnika, u jakoha viasielle było ŭ kancy vieraśnia. Darečy, z uzrostam Anton taksama padmanuŭ, jamu 25.
Ech, znoŭ chłuśnia, znoŭ abłom.
22 kastryčnika ja, što nazyvajecca, psichanuła. Nadakučyli adnyja i tyja ž pytańni, adnyja i tyja ž razmovy. Vyryšała: da 1 listapada ciahnuć niama sensu.
I znakam taho, što z sajtam znajomstvaŭ čas zaviazvać, stała voś heta paviedamleńnie:
Seks za hrošy prapanoŭvali, sustrečy biez abaviazkaŭ taksama, ale voś kab jašče hrošy prasić…
Na adnu pryjemnuju sustreču ja ŭsio ž schadziła. Chłopiec, ź jakim my daŭno znajomyja, ubačyŭ na sajcie maju ankietu. Doŭha śmiajaŭsia i zaprasiŭ na čaj, kab abmierkavać heta. Nu što, čamu b i nie papić čaju z chłopcam z sajta znajomstvaŭ, praŭda, z tym, kaho ty i tak viedaješ 100 hadoŭ?
Vynik, jaki zrabiła za miesiac, niesuciašalny. Ni kachańnia, ni siabra tut znajści nie ŭdałosia. Kali i zdarajucca sustrečy, to jany na adzin-dva razy. Nichto bolš nie choča marnavać čas «biez praciahu».
Nie viedaju, moža, heta tolki na «Tabary» tak. I kab zaviaršyć ekśpierymient, moža, varta było b zarehistravacca na inšych resursach, ale jak padumaju pra toje, što daviadziecca adkazvać na paviedamleńni «z kim žyvieš» i «cikavić seks biez abaviazkaŭ», adrazu zvodzić skivicu.
I bolš takich ekśpierymientaŭ nie chočacca.
Čytajcie taksama:
Jak biełaruskamoŭnaja žančyna 35+ šukała mužčynu na Cindary
