Patryjarch Varfałamiej: RPC rana ci pozna pryznaje aŭtakiefaliju Ukrainskaj carkvy. U ich niama vybaru
Kanstancinopalski patryjarch Varfałamiej u chodzie pasiadžeńnia haradskoha praŭleńnia hrečaskaj dyjaspary ŭ Stambule zajaviŭ, što Suśvietny patryjarchat vałodaje vyklučnymi pravami, jakija zasnavanyja na rašeńniach Suśvietnych saboraŭ, što robić jaho rašeńni abaviazkovymi dla ŭsich u pravasłaŭnym śviecie.
Varfałamiej paviedamiŭ, što ŭ spravie nakont aŭtakiefalii va Ukrainie jon adstupać nie źbirajecca. Na jaho dumku, Ruskaja pravasłaŭnaja carkva (RPC) rana ci pozna padparadkujecca rašeńniu Kanstancinopalskaha patryjarchata.
«Padabajecca heta našym ruskim bratam ci nie, davoli chutka jany pasłuchajucca Suśvietnaha patryjarchata, pakolki ŭ ich niama inšaha vybaru», — skazaŭ patryjarch.
Jon ličyć, što vyrašaje ŭkrainskuju prablemu na asnovie carkoŭnaha prava, jakoje dadziena Suśvietnamu patryjarchatu na Saborach, zmahajecca za toje, kab vyratavać pravasłaŭje ad nacyjanalizmu, zachavaŭšy suśvietnuju pravasłaŭnuju kulturu. U Rasii, pavodle jaho słoŭ, dziejničaje «čornaja prapahanda» z «dobra prapłočanymi artykułami», jakaja «bje pa Kanstancinopalskamu patryjarchatu».
