U Kurapatach skončylisia raskopki, pamiatny znak pačnuć stavić praz dva tydni
Va ŭročyščy Kurapaty skončylisia archieałahičnyja raskopki na miescy ŭstanoŭki pamiatnaha znaka. Katłavan pad padmurak padrychtavany, sam znak pačnuć ustaloŭvać praz dva tydni.
Aŭtary prajekta prynieśli ŭ Kurapaty makiet budučaha pomnika. Fota: Vadzim Zamiroŭski, Tut.by.
16 kastryčnika ŭ Kurapatach pačalisia raskopki na miescy, jakoje žury Minkulta vybrała dla ŭstanoŭki miemaryjalnaha znaka — jon budzie stajać na «Hałhofie». Aktyvisty vystupali suprać hetaha miesca i prapanoŭvali pastavić kaplicu na ŭvachodzie va ŭročyšča, ale raskopki na hary ŭsio ž pačalisia. Archieołahi tłumačyli: raskopki nieabchodna pravieści, kab pierakanacca, što pad pomnikam nie budzie pareštkaŭ achviar rasstrełaŭ. Da taho ž, heta pieršyja za 20 hadoŭ archieałahičnyja pracy va ŭročyščy. Płošča raskopak była nievialikaja: try na try mietry, hłybinia — dva mietry. U pieršy dzień rabot archieołahi znajšli hilzy ad tabielnaj zbroi rabotnikaŭ NKUS 1937-1940-ch hadoŭ.
Raskopki skončylisia ŭ kancy minułaha tydnia. Zaraz archieołahi buduć vieści nahlad za dobraŭparadkavańniem terytoryi vakoł pomnika — da jaho płanujuć prakłaści ściežki.
— Hłybinia dla pomnika patrebna 1,4 mietra, ale my vykopvali amal 2 mietry, kab pierakanacca, što tam niama pareštkaŭ. Raskopki skončany, zaraz my pracujem tolki ŭ farmacie archieałahičnaha nahladu za dobraŭparadkavańniem ściežak, jakija buduć prakładzieny da pomnika. Tam miarkujecca źjem hruntu da 20 santymietraŭ, tamu budziem sačyć, moža hilzy ci asabistyja rečy rasstralanych trapiacca. Zaraz prosta vyraŭnoŭvajuć ściežki, jakija dobraŭparadkoŭvali i padsypali pierad vizitam Klintana, — zahadčyk adździeła archieałohii Siarednich viakoŭ i Novaha času Vadzim Košman.
Pareštkaŭ ci inšych pradmietaŭ, akramia hilzaŭ, padčas raskopak nie znojdziena. Hilzy, pa słovach Vadzima Košmana, adnosiacca da dvuch pieryjadaŭ: pieryjadu saviecka-polskaj vajny i 1937-1940-ch hadoŭ.
Ciapier u katłavan buduć zalivać padmurak, a na pačatku listapada płanujuć pačać ustanoŭku pamiatnaha znaka.
