U Śvietłahorsku prajšoŭ pratestny fłešmob suprać kitajskaha zavoda, ludzi vychodzili siemjami FOTY
U Śvietłahorsku 15 vieraśnia prajšoŭ fłešmob suprać vykidaŭ z kitajskaha zavodu. Nia mienš za 150 čałaviek u medycynskich maskach i ź zialonymi pavietranymi šarami sabralisia kala centralnaj płoščy. Placoŭku ŭ pryznačany čas — 17.00 ź inicyjatyvy ŭłady zaniali dzieci. Jany tancavali i zapuskali pavietranyja šary čyrvonaha koleru, paviedamlaje «Radyjo Svaboda».
Heta vyhladała na repetycyju da Dnia horadu, jaki projdzie ŭ nastupnuju subotu. Pensijanery, maładyja siemji ź dziećmi, staršaklaśniki «prybralisia» u medycynskija maski, trymali zialonyja pavietranyja šary jak symbal taho, što ludzi chočuć dychać čystym pavietram. Žychary rajcentru aburanyja, što novy zavod bielenaj celulozy zabrudžvaje pavietra. Ad vykidaŭ u horadzie časta staić smurod.
Pamiž žycharami rajcentru chadziŭ milicyjant Jaŭhien Biaspalka i papiaredžvaŭ praz mehafon, što «dadzienaje mierapryjemstva niesankcyjanavanaje», za što nastupaje adkaznaść pa artykule 23.34 Kodeksu ab administracyjnych pravaparušeńniach. «Dyk aryštuj nas! Nam usio roŭna, dzie pamirać — tut ci ŭ turmie!», — zakryčała na milicyjanta pensijanerka. Inšyja ŭdzielniki fłešmobu pytalisia ŭ milicyjanta — ci jość u jaho dzieci i ŭnuki?
«Heta nie mitynh, nie pikiet — transparantaŭ i plakataŭ nie było, nichto nie vysoŭvaŭ niejkich patrabavańniaŭ. Tamu nia varta milicyi pahražać ludziam. Jany prosta vyjšli dychać čystym pavietram», — prakamentavała pravaabaronca Alena Maślukova.
Jana dadała, što ludzi damaŭlalisia ci naohuł nie iści na Dzień horadu ŭ nastupnuju subotu, ci pryjści tudy ŭ maskach i ź zialonymi pavietranymi šarami.
Inicyjatyŭnaja hrupa pa manitorynhu sytuacyi z zavodam padavała ŭ vykankam zajaŭku na mitynh. Jon planavaŭsia 15 vieraśnia. Ale adzinuju ŭ horadzie placoŭku, vyznačanuju dla mitynhaŭ i pikietaŭ (stadyjon «Bumažnik») u pryznačany dzień akupavaŭ BRSM. Tam prachodziła śviata «Vaładar siała». Tady žychary rajcentru damovilisia pravieści fłešmob.
Rankam 15 vieraśnia ŭ prakuraturu vyklikali pravaabaroncu Alenu Maślukovu i aktyvista Anatola Źmitroviča. Prakuror rajona aficyjna papiaredziŭ ich pra adkaznaść za ŭdzieł ci arhanizacyju niesankcyjanavanych mierapryjemstvaŭ.
