Chto taki ministr budaŭnictva Anatol Čorny, jaki vylataje z pasady, nie adramantavaŭšy dach u Oršy?
Na naradzie ŭ Oršy kiraŭnik krainy Alaksandr Łukašenka ahučyŭ, što ŭ adstaŭku adpraŭlenyja ministr pramysłovaści Vital Voŭk, a taksama ministr budaŭnictva i architektury Anatol Čorny. Pra ŭradženca Kalinkavič Voŭka my pisali raniej. Łukašenka paćvierdziŭ, što ŭsio jašče ministr pramysłovaści pajedzie ŭ Oršu.
Anatol Čorny. Fota rh.by.
Vialikaja dola krytyki ž była datyčnaja ministra budaŭnictva i architektury Anatola Čornaha. Łukašenka skazaŭ, što čynoŭnik tak i nie adramantavaŭ dach na aršanskim instrumientalnym zavodzie, chacia jamu było heta paručana.
Chto ž taki Anatol Čorny? Jamu 60 hadoŭ, jon naradziŭsia ŭ Kalinihradskaj vobłaści Rasii ŭ haradku Čarniachoŭsk. Ale ŭsio svaje śviadomaje žyćcio pravioŭ u Biełarusi. Možna navat skazać, što ŭ adnym horadzie — Mahilovie.
Tam Čorny skončyŭ Mašynabudaŭničy instytut (1984) pa śpiecyjalnaści «Budaŭničyja i darožnyja mašyny i abstalavańnie». Paśla hetaha na doŭhi čas Čorny źviazaŭ žyćcio z pradpryjemstvam «Mahiloŭsielbud». Pracavaŭ tam kiroŭcam, majstram, hałoŭnym miechanikam, hałoŭnym inžynieram.
Ad 2002 da 2010 źjaŭlaŭsia hienieralnym dyrektaram «Łaŭsanbuda».
U 2010 staŭ namieśnikam staršyni Mahiloŭskaha abłvykankama Piatra Rudnika. A praz try hady Łukašenka pryznačyŭ jaho ministram architektury i budaŭnictva.
Kali pierajechaŭ u Minsku, to ŭziaŭ kredyt u «Biełahraprambanku» na budaŭnictva dvuchpakajovaj kvatery. Budavaŭsia va Uruččy. Da hetaha žyŭ u słužbovym žylli.
Maje dačku i syna. Abaim kala 40 hadoŭ. «U hetym uzroście ŭžo treba mieć ułasnaje žyllo, ale ŭ Minsku nikoha niama», — kazaŭ ministr. Syn nie pajšoŭ pa śladach baćki. «Jon u mianie bolš humanitaryj, viedaje zamiežnyja movy. Ja nikoli nie nastojvaŭ na vybary budaŭničaj prafiesii», — jašče adna cytata čynoŭnika.
Sam Čorny kazaŭ, što zastavacca ŭ vydatnaj fizičnaj formie jamu dapamahaje toje, što jon prapłyvaje kožny ranak pa adnym kiłamietry ŭ basiejnie. «Što tyčycca chobi, to lublu pačytać, a na takija zabavy, jak palavańnie i rybałka, prosta nie zastajecca času», — kazaŭ Čorny.
Ministr raskazvaŭ, što ŭ jaho amal štoraz 12-hadzinny rabočy dzień. Kaža, što asabliva padabajecca pracavać ranicaj, kali jašče nichto nie pryjšoŭ.
***
Usie ministry budaŭnictva i architektury Biełarusi:
- Hienadź Navicki (1994 — 1997)
- Viktar Vietraŭ (1997 — 1999)
- Hienadź Kuračkin (1999 — 2006)
- Alaksandr Sielaźnioŭ (2006 — 2010)
- Anatol Ničkasaŭ (2010 — 2013)
- Anatol Čorny (15 kastryčnika 2013 — da ciapierašniaha času)
