Hiej-skandał jašče i ŭ MUS? Pasadu straciŭ pałkoŭnik
Niezvyčajnaja historyja adbyłasia ŭ adnym z abłasnych upraŭleńniaŭ unutranych spraŭ.
Jak stała viadoma «Našaj Nivie» ad dźviuch krynic, vysokapastaŭleny štabny aficer adnaho z abłasnych UUS (dakładnuju pasadu nie nazyvajem zychodziačy z etyčnych mierkavańniaŭ) mieŭ amurnyja adnosiny ź inšymi mužčynami. Nam nie ŭdałosia daviedacca, ci byli jany jahonymi padnačalenymi.
Viersii ab tym, jak pra heta stała viadoma ŭpraŭleńniu ŭłasnaj biaśpieki i ŭ čym było parušeńnie słužbovaj etyki, razychodziacca. Sychodziacca krynicy ŭ adnym — z orhanaŭ pałkoŭniku daviałosia syści.
Byłyja padnačalenyja ŭ telefonnaj razmovie paćvierdzili, što hety čałaviek bolš u sistemie MUS nie pracuje. Z aficyjnaha sajta jaho proźvišča taksama źnikła — u adpaviednaj hrafie nasuprać pasady pustoje miesca.
Da prychodu ŭ milicyju pałkoŭnik pracavaŭ u Śledčym kamitecie.
Admietna taksama, što rezanansnaja zajava MUS «Jany nie projduć!», u jakoj siłaviki raskrytykavali pasolstva Brytanii za ściah ŁHBT, pa časie supała z vyjaŭlenym faktam u abłasnym UUS.
Mahčyma, brytancy prosta trapili «pad haračuju ruku» u čas, kali ŭ ministerstvie byli ŭ šoku ad pavodzinaŭ vysokapastaŭlenaha supracoŭnika MUS.
Niekalki dzion tamu my paprasili pres-słužbu hetaha abłasnoha UUS paćvierdzić ci abvierhnuć našu infarmacyju. Pakul adkazu nie atrymali.
Varta adznačyć, što niestatutnyja adnosiny stali pryčynaj zvalnieńnia niekalkich supracoŭnikaŭ i ŭ adnym z adździełaŭ Śledčaha kamiteta.
