Hiej-skandał u Śledčym kamitecie? Pasady stracili niekalki supracoŭnikaŭ
Niezvyčajnaja historyja adbyłasia ŭ adnym z rajonnych adździaleńniaŭ Śledčaha kamiteta pa Hrodzienskaj vobłaści. Jak stała viadoma «Našaj Nivie» z krynic u siłavych orhanach, niekalki adnapołych supracoŭnikaŭ SK mieli adzin da adnaho amurnyja pačućci. Charaktaram adnosin aficeraŭ zacikaviłasia ŭpraŭleńnie ŭłasnaj biaśpieki Śledčaha kamiteta i ŭ pačatku maja apieratyŭniki zaśpieli ich u atmaśfiery žarści prosta ŭ pracoŭnym kabiniecie.
Prynamsi, tak śćviardžajuć krynicy.
Jak było nasamreč?
Aficyjna paćvierdžana, što niekalki śledčych i kiraŭnik taho rajonnaha ŭpraŭleńnia zvolnieny.
«U […] upraŭleńni samastojna pryniali rašeńnie i razarvali adnosiny pa zhodzie bakoŭ: načalnik i niekalki śledčych.
Usie pastaŭlenyja zadačy rajonnaje adździeleńnie vykonvaje ŭ poŭnaj miery. Heta ŭsio, ja maksimalna jasna kažu — supracoŭniki zvolnilisia pa svaim žadańni», — skazaŭ «Našaj Nivie» pres-aficer hrodzienskaha Śledčaha kamiteta Siarhiej Šaršanievič.
Na pytańnie, ci byli ŭ hetaj situacyi elemienty skandału, Šaršanievič adkazvać nie staŭ, paŭtaryŭšy, što «ŭsio skazana».
Krynicy ŭ viedamstvie tłumačać, što farmalna intym na pracoŭnym miescy traktavaŭsia jak parušeńnie pracoŭnaj etyki, kodeksa honaru aficeraŭ Śledčaha kamiteta.
Były načalnik rajonnaha SK nie staŭ adkazvać na pytańnie ab pryčynach zvalnieńnia — kinuŭ trubku.
Adznačym, što tydzień tamu ŭkazam prezidenta źnianacku byŭ źniaty načalnik Śledčaha kamiteta pa Hrodzienskaj vobłaści, hienierał-major Iosif Leanko.