Kałumbijski fanat piŭ ałkahol na stadyjonie ŭ Rasii. Jaho abvieścili hańbaj nacyi i zvolnili z pracy
19 červienia Kałumbija hulała ź Japonijaj u Saransku.
Kałumbijskija fanaty pranieśli ałkahol ŭ flažcy, jakaja vyhladaje jak binokl (pa praviłach, pranosić ałkahol na stadyjon zabaroniena). Flažka chadziła pa rukach, ludzi vypivali, žartavali i śmiajalisia. Usio heta źniali na telefon i zalili ŭ tviter.
Videa nabrała šalonuju papularnaść (958 tysiač prahladaŭ), a chieštieh #binoculares (binokl) vyjšaŭ u trendy dnia kałumbijskaha tvitera.
U Kałumbii ŭsie vielmi niezadavolenyja
Papularny kałumbijski radyjoviadučy Žan-Pjer Sierna napisaŭ pra kulturnyja adroźnieńni pamiž japoncami i kałumbijcami: «Japoncy zastajucca paśla hulni, kab prybrać śmiećcie sa stadyjona, a kałumbijcy śmiajucca z zakonaŭ».
MZS Kałumbii zaklikaŭ svaich hramadzian pavažać zakony Rasii.
Videa dajšło da syna prezidenta Kałumbii — palityka i hramadskaha dziejača Marcina Santasa: «Spačatku my ličym, što takija videa — heta śmiešna, a potym dzivimsia, što mienavita nas abšukvajuć ŭ aeraportach».
Stereatyp ab kałumbijcach-narkahandlarach, jakija śpiecyjalizujucca na tym, kab nieprykmietna pranosić narkotyki — vielmi balučaja tema dla krainy. U 1990-ja ŭłady aktyŭna vajavali z narkakartelami. Mienavita tamu ludziej začapiŭ učynak kałumbijskich zaŭziataraŭ — jon vyklikaŭ asacyjacyi z vobrazam narkahandlara.
U sacsietkach taksama aburalisia:
«My chvoryja jak hramadstva. Heta nie dazvalaje nam raźvivać krainu».
«Jany parušajuć zakon i nie pavažajuć krainu, jakaja haścinna sustrakaje ich»
«Heta žach. Japoncy paśla hulni prybirajuć za saboj śmiećcie, a kałumbijcy vyśmiejvajuć ludziej i hańbiać nacyju».
Apaznali adnaho čałavieka
Łuis Felipe Homies na videa sprava ŭ kiepcy i sa ściahami na tvary. Spačatku jaho zvolnili z pracy. 20 červienia avijakampanija Avianca Holding (Homies byŭ rehijanalnym menedžeram pa kirunku Jeŭropa-Azija) zajaviła: «Avianca Holdings asudžaje lubyja dziejańni našych rabotnikaŭ, jakija supiarečać kaštoŭnaściam i pryncypam kampanii. U suviazi z hetym my pryniali rašeńnie anulavać pracoŭnuju damovu z našym supracoŭnikam, jaki parušaŭ zakony, pryniatyja na čempijanacie śvietu, užyvajučy ałkahol na stadyjonie».
Miascovyja miedyi paviedamili, što ŭłady Kałumbii zapatrabavali anulavać Fan ID Homiesa. Kali heta adbudziecca, kałumbijec bolš nie zmoža naviedvać matčy čempijanatu śvietu ŭ Rasii.
Tearetyčna heta mahčyma — niekalki dzion tamu za nieprystojnyja pavodziny anulavali Fan ID arhientynskaha zaŭziatara.
«Ja prosta padyšoŭ pavitacca z paraj svaich siabroŭ. Mnie prapanavali vypić, i ja pahadziŭsia, tamu što adčuvaŭ ejfaryju ad taho, što baču Kałumbiju na čempijanacie śvietu. Ja nie mahu zrazumieć, jak 15 siekund videa, vyrvanyja z kantekstu i absalutna niapravilna interpretavanyja, mohuć zrujnavać honar čałavieka?» — napisaŭ Homies ŭ fejsbuku.
Pakul što Homiesa padtrymała tolki jaho žonka: «Łuis — prystojny čałaviek, jaki prosta trapiŭ u drennuju situacyju. Nievierahodna, što hramadstva adreahavała tak».
Zatoje Fiederacyja futboła Kałumbii zaŭziatara nie padtrymała. «Suajčyńniki, my dziakujem vam, kali vy pryjazdžajecie ŭ Rasiju, kab padtrymać zbornuju. Ale nie zabyvajcie pavažać zakony krainy, jaje žančyn i vašych supiernikaŭ», — prakamientavaŭ kiraŭnik fiederacyi futboła Ramon Chiesurun.
Kali sočycie za čempijanatam śvietu pa futbole, raim vam zrabić staŭku ŭ Bukmiekierskaj kantory Marafon!
