Śviatłana Aleksijevič: Hetyja Šunievičy pačuvajucca absalutna biespakaranymi
«Poŭnaje padzieńnie hramadztva» — tak nazyvaje nobeleŭskaja laŭreatka pa litaratury (2015) Śviatłana Aleksijevič źjaŭleńnie restaracyi na miescy masavych rasstrełaŭ, paviedamlaje «Svaboda».
«Mianie nie pakidaje vobraz ministra Šunieviča ŭ formie NKVD. Ja zrazumieła hłybiniu padzieńnia našaj ułady.
Ja dumaju, Šunievič nie čytaŭ ani Sałžanicyna, ani Šałamava, i paniaćcia pra heta nia maje. Pa-druhoje, ja zrazumieła, što pakolki tolki maładyja abaraniajuć naš honar, u tym liku i ŭ Kurapatach, hetyja Šunievičy pačuvajucca absalutna biespakarana», — kaža Śviatłana Aleksijevič na prośbu prakamentavać sytuacyju z pratestami vakoł adkryćcia restarana «Pojediem pojedim».
«Kali ŭžo hety restaran, to heta absalutnaje padzieńnie hramadztva, — kaža nobeleŭskaja laŭreatka. — Dumaju, dazvoliła im heta vysokaja ŭłada. Jak my viedajem, u hetaj krainie dach nichto nie paramantuje biez vysokaha dazvołu. Tak što tam ciomnyja zusim spravy. I hetaja administratarka [Śviatłana Dubkova, administratarka restarana, jakaja ŭ kamentarach nazvała pratestoŭcaŭ «zbrodam», pry hetym sama nie zmahła napisać słova «cyvilizavany» biez pamyłki], niepiśmiennaja žančyna, jakaja skazała, što «heta ludzi, jakija suprać ułady»».
Śviatłana Aleksijevič ličyć, što ŭsio hramadztva niasie adkaznaść za heta.
«Možna kazać i pra našu ŭłasnuju adkaznaść, kožnaha z nas. My heta dazvolili. Čamu hramadztva maŭčyć? U luboj eŭrapiejskaj krainie byli b sotni tysiač na vulicach», — kaža Śviatłana Aleksijevič.
«Jany chočuć pastavić kamień u Kurapatach, — reahuje Śviatłana Aleksijevič na inicyjatyvu ŭłady ŭstalavać u Kurapatach aficyjny memaryjał. — I im zdajecca, što takim čynam jany atrymajuć indulhiencyju na toje, kab usio heta paŭtaryłasia iznoŭ».