«Restaran musić pracavać na radaść ludziam!» — minčuk, jakoha ŭ Kurapatach pakusała aktyvistka Natalla Basałyha
5 červienia płanavałasia adkryćcio restarana «Pajedziem, pajadzim». Ustanova, jakaja raniej mieła nazvu «Bulbaš-Choł», znachodzicca ŭ Kurapatach, za dziasiatki mietraŭ ad miescaŭ masavych rasstrełaŭ.
Heta aburyła hramadskaść, tamu aktyvisty pratestavali suprać adkryćcia restarana. Adna ź ich, Natalla Haračka-Basałyha, navat ukusiła mužčynu, jaki pryjechaŭ u restaran zamaŭlać stoł. Paśla aktyvisty nazvali mužčynu pravakataram.
«Naša Niva» pahutaryła z mužčynam. Heta 53-hadovy minčuk Aleh Zadarožny. U dziacinstvie jon zdymaŭsia ŭ kino, ciapier, pa jaho słovach, pracuje strachavym ahientam.
«Ja nijaki nie pravakatar. Kali chtości tak nazyvaŭ — ich pryvatnaja sprava. Ja skažu tak — ja pryjechaŭ pajeści, a pajeli mianie, — narakaje Zadarožny. — Hety restaran ja vybraŭ tamu, što jon pobač z maim domam. U mianie dzień narodzinaŭ 7 červienia, ja chacieŭ zamović stoł, pasiadzieć ź siamjoj, vypić sto hram».
Raźmiaščeńnie restarana ŭ Kurapatach nie asabliva turbuje surazmoŭcu.
«Heta narmalna. Ja biełarus, maje karani sa Skidziela. Maje prodki spradvieku žyli na toj ziamli, mieli haspadarku, svaju ziamlu. I ja jak biełarus liču, što pryjšoŭ čas. Prajšła padzieja, ciapier raźvićcio idzie. Čamu raźvićcio musić spyniacca, bo tut [u Kurapatach] hinuli ludzi? — zadajecca pytańniem Zadarožny. — U nas usia Biełaruś u kaściach. I kostki biełarusaŭ, i palakaŭ, manhoł, tataraŭ, niemcaŭ… To što, nam usim syści z hetaj ziamli? Bo jana ž usia pakryta kostkami niespraviadliva zabitych ludziej».
Što tyčycca kanfliktu, kaža Zadarožny, to jon jaho nie pravakavaŭ:
«Ja pryjechaŭ pajeści, a tyja ludzi stajać na prajeznaj častcy. Dyk chaj jany adyjduć ubok i tam vyražajuć svaje pohlady. Ja nie suprać!»
Milicyju, kaža jon, vyklikała sama Basałyha. Kali jaho aprošvali, Zadarožny pakazaŭ milicyjantam ukus.
Toj ukus. Fota «Minsk-Novosti»
«Ja pajechaŭ u traŭmapunkt. Tam mnie zrabili pryščepku ad słupniaku, bo paškodžana skura. Chacieli rabić pryščepku ad šalenstva, ale skazali, što pakul hetuju žančynu nie złavili i nie ŭziali ŭ jaje analiz, to mianie buduć nazirać. Kali mnie budzie horš, to pačnuć lačyć ad šalenstva», — zapeŭnivaje Zadarožny.
Jon ličyć, što Natallu Basałyhu treba pakarać «zhodna z zakanadaŭstvam».
«Za svaje dziejańni treba adkazvać! Ja nikoha tam nie čapaŭ! A jana mianie ŭkusiła! — aburajecca Aleh Zadarožny. — Nie treba kusać ludziej, jakija pryjechali ŭ restaran. Restaran jość restaran. Jaho adkryli, budavali… I jon musić pracavać na radaść ludziam! Davajcie ž ruchacca napierad, chopić być tam, zzadu. Treba iści napierad!»
Tym časam restaran «Pajedziem pajadzim» usio ž adkryŭsia — tajemna i ŭnačy.
