Partyja Hajdukieviča choča sabrać u Minsku pradstaŭnikoŭ prarasijskich nacyjanalistyčnych partyj z usioj Jeŭropy
U akaŭntach Libieralna-demakratyčnaj partyi ŭ sacyjalnych sietkach źjaviłasia infarmacyja, što arhanizacyja rychtuje ŭ Minsku Kanhres patryjatyčnych partyj Jeŭropy.
Aleh Hajdukievič.
Buduć pradstaŭniki Nacyjanalnaha fronta Francyi, Partyi svabody Aŭstryi, «Alternatyvy dla Hiermanii», «Adzinaj Rasii» i jašče bolš za 15 partyj Jeŭropy, paviedamlajecca ŭ supołcy ŁDP Ukantakcie.
Nacyjanalny front Francyi — heta nacyjanalistyčnaja partyja, jakuju ŭznačalvaje Maryn Lo Pen. Partyja maje 8 miescaŭ u parłamiencie z 577. Heta papulisckaja partyja, jakaja nabiraje hałasy dziakujučy vystupam suprać mihrantaŭ. Maryn Lo Pen padčas krymskich padziej 2014 hoda nazvała Pucina «abaroncam chryścijanskaj spadčyny jeŭrapiejskaj cyvilizacyi». Hetaja arhanizacyja šmat krytykuje Jeŭrasajuz.
Aŭstryjskuju partyju svabody taksama zaličvajuć u papulisty i ŭltrapravyja. I hetaja partyja taksama dasiahaje pośpiechu najpierš praz ahitacyju suprać mihrantaŭ. U časy kiraŭnictva partyjaj radykalnaha lidara Jorha Chajdera APS nabirała da 27% hałasoŭ na parłamienckich vybarach. Chajdera ŭ Aŭstryi nazyvali «advakatam nacyzmu».
Pry hetym Aŭstryjskaja partyja svabody maje stabilna vysokija vyniki padčas vybaraŭ. Partyja jeŭraskieptyčnaja. A naprykancy 2016 hoda zaklučyła pahadnieńnie ab supracoŭnictvie z «Adzinaj Rasijaj» Pucina.
«Alternatyva dla Hiermanii» — jeŭraskieptyčnaja partyja, jakaja stała treciaj na apošnich vybarach u niamiecki parłamient. Asablivuju papularnaść arhanizacyja maje ŭ byłoj HDR. «Alternatyva» nastojvaje na vychadzie Hiermanii z zony jeŭra. Chacia navat jany nie vystupajuć za rospusk Jeŭrasajuza, ličačy jaho karysnym dla krainy. Kancler Hiermanii Anhieła Mierkiel vykazvała škadavańnie, što «Alternatyva» moža pieraciahnuć vialikuju kolkaść vybarcaŭ z kansiervatyŭnymi ci niavyznačanymi pohladami.
My spytali ŭ namieśnika staršyni ŁDPB Aleha Hajdukieviča, čamu jany źbirajuć u Minsku jeŭrapiejskich nacyjanalistaŭ.
«Ja admaŭlajusia razmaŭlać z pravymi partyjami krajniaha tołku, tolki pravacentrysckimi. Pravacentrysckija partyi vielmi dobra staviacca da Biełarusi, zaŭsiody vystupali suprać sankcyj i za ekanamičnaje supracoŭnictva.
Nu a padabienstva z ŁDPB u tym, što my prychilniki žorstkaha adstojvańnia svaich nacyjanalnych intaresaŭ usiudy: i na Zachadzie, i ŭ JEAES. Z radykalnymi pravymi partyjami my supracoŭničać nikoli nie budziem. I my nie zakryvajemsia ad pradstaŭnikoŭ sacyjał-demakratyi i kirujučych partyi Jeŭropy.
Mnie padabajecca, što hetyja partyi staviać pieradusim intaresy krainy — heta zdarovy nacyjanalizm, što raŭniajecca patryjatyzmu. My nie padtrymlivajem zakliki da razvału Jeŭrasajuza, heta niavyhadna Biełarusi. Nam vyhadnaja mocnaja Jeŭropa. Nie raspad, a refarmavańnie», — skazaŭ Hajdukievič.
Pakul nieviadoma, kali projdzie hety kanhres. Miarkujecca, što ŭ druhoj pałovie hetaha hoda.
