Izrail rasstralaŭ demanstracyju paleścincaŭ na miažy. Zahinuli 59 čałaviek, siarod ich padletki
Mohemad Abed/AFP
59 paleścincaŭ zahinuli i bolš za 2200 byli paranienyja ŭ vyniku rasstrełu Izrailem demanstracyj na miažy ź siektaram Haza.
Jak paviedamlaje Haaretz 14 maja kala 40 tysiač žycharoŭ siektara Haza vyjšli na marš pratestu i nakiravalisia da miažy ź Izrailem, dzie ŭstupili ŭ sutyknieńni ź izrailskimi vajskoŭcami.
Akcyja prymierkavana da adkryćcia ŭ Ijerusalimie amierykanskaha pasolstva, a taksama 70-hodździa ŭtvareńnia Izraila i «Dniom Nakba» za im — vyhnańniem arabaŭ sa svaich ziemlaŭ.
Demanstranty špurlali ŭ sałdat kamiani i sprabavali pierasiekčy miažu, izrailcianie adkazali ahniom.
Araby nie pryznajuć isnych miežaŭ Izraila i patrabujuć vyzvaleńnia im terytoryj, zachoplenych na praciahu 1948—1973 hadoŭ. Izrail ličyć, što adstupleńnie ŭ miežy 1948 hoda zrobić łapik habrejskaj terytoryi nieprydatnym dla abarony ŭ situacyi, kali mnohija arabskija dziaržavy admaŭlajuć Izrailu ŭ pravie na isnavańnie. Akramia taho, Izrail uvažaje, što maje prava histaryčnaj spraviadlivaści na Ijerusalim. U toj ža čas AAN u svoj čas pastanaviła, što hety horad maje być padzieleny na dźvie častki, adna ź jakich maje naležać paleścincam.