Baraćba z karupcyjaj, raźviedka, hramadskaja biaśpieka — Łukašenka pryniaŭ z dakładam staršyniu KDB
Alaksandr Łukašenka pryniaŭ siońnia z dakładam staršyniu KDB Biełarusi Valeryja Vakulčyka, piša BiełTA.
«Ja ŭžo niejak kazaŭ z nahody pracy KDB i dziakavaŭ kalektyvu. Jašče raz chaču padkreślić, što efiektyŭnaja baraćba z karupcyjaj bačnaja. U KDB hetamu nadajuć vialikaje značeńnie. Małajcy chłopcy, jakija pracujuć u hetym napramku», — skazaŭ kiraŭnik krainy.
Razam z tym Łukašenka pacikaviŭsia situacyjaj u śfiery procidziejańnia i vyjaŭleńnia karupcyi. «Što bolš za ŭsio naściarožvaje ŭ hetym płanie?» — spytaŭ Alaksandr Łukašenka.
Jon padkreśliŭ, što ŭ KDB jość i śpiecyfičnyja napramki raboty, jakija bolš nichto nie moža ažyćciaŭlać. Heta ŭ tym liku raźviedka, kontrraźviedka, antyterarystyčnaja dziejnaść, abarona kanstytucyjnaha ładu. «Heta nie zdymajecca. Usie pavinny razumieć, i hramadstva ŭ tym liku, što kamitet u hetym płanie pracuje. I zakanamiernaje pytańnie: u nas tut jakija vyniki?» - pacikaviŭsia biełaruski lidar.
Jon źviarnuŭ uvahu na pytańni hramadskaj biaśpieki: «U nas prajšoŭ šerah bujnych mierapryjemstvaŭ ź vialikaj kolkaściu nasielnictva. I napieradzie Dzień Pieramohi, Dzień Niezaležnaści. Tut my pavinny taksama bačyć, ci jość u nas prablemy napiaredadni hetych mierapryjemstvaŭ. Nu i naohuł, jak kamitet aceńvaje situacyju ŭ śfiery hramadskaj biaśpieki?»
Na sustrečy zakranalisia i niekatoryja inšyja pytańni, u tym liku kadravyja.
Asobna Alaksandr Łukašenka daŭ daručeńnie ŭ dačynieńni, nakolki heta mahčyma, padrabiaznaha infarmavańnia hramadskaści ab vynikach dziejnaści orhanaŭ dziaržbiaśpieki. «Kab nie kazali, što my tut zasłonaj pakryli ŭsio, chavajem ad naroda. Toje, što treba, my chavajem, tamu što heta nie vydajecca. Ale ŭ bolšaści svajoj chavać niama čaho», — adznačyŭ kiraŭnik dziaržavy.
