Vizijanierski vystup Viktara Prakapieni ŭ «Minsk-Arenie»: prafiesii budučyni, kapieječnaja enierhija, prajekty nieśmiarotnaści
Repartaž radyjo «Svaboda» z forumu Hi-Tech Nation, što adbyŭsia na «Minsk-Arenie» 20 krasavika.
Kryvavyja ličby 16/03 — taki byŭ pieršy słajd prezentacyi Viktara Prakapieni.
«Niejak ja pastaviŭ zadaču menedžaru adnaho z našych biznesaŭ «dać termin relizu prajektu, padpisacca kryvioj». Toj zrazumieŭ zadaču litaralna — napisaŭ datu kryvioju na liście papiery», — patłumačyŭ Viktar Prakapienia. — Menedžar nia zdaŭ prajekt u termin, choć vielmi chacieŭ. Tamu što jahonyja sposaby i padychody da rašeńnia zadačy, jakija jon vykarystoŭvaŭ, byli niapravilnyja».
«Dumać liniejna — daroha da hibieli»
Ekspanencyjnaje myśleńnie — voś što važna dla razumieńnia ciapierašnich pracesaŭ i prahnazavańnia taho, što budzie dalej adbyvacca sa śvietam i ekanomikaj.
Siońnia maleńkaja mikraschiema koštam 5 dalaraŭ maje mahutnaść, roŭnuju mahutnaści superkamputara, jaki zapuskaŭ čałavieka na Miesiac niekalki dziasiatkaŭ hadoŭ tamu. Pa canie kubka kavy nam siońnia dastupnaja supertechnalohija.
Ci možna było heta pradkazać, dumajučy liniejna ŭ tyja časy?
Kali technalohija budzie takim čynam raźvivacca i nadalej, to praz 15 hadoŭ naš mabilny telefon budzie mieć takuju ž mahutnaść, jak adzin čałaviečy mozh. Jašče trochi času — i pry našym z vami žyćci mahutnaść mabilnaha telefona pieravysić intelekt i zdolnaści ŭsioj čałaviečaj rasy razam.
Śviet ruchajecca ad abmiežavanaści da dastatku. Abmiežavanaja enerhija vuhlevadarodaŭ zamianiajecca soniečnaj elektraenerhijaj. U 1977 hodzie 1 kVt soniečnaj elektraenerhii kaštavaŭ 76 dalaraŭ, a ŭ 2016 hodzie — 30 centaŭ. Siońnia jość prajekty, dzie jaje košt 3 centy. U 2040 hodzie heta budzie nul. Kali hety trend praciahniecca, projdzie niašmat času, i ŭsia elektraenerhija budzie traplać nam ad soniečnych panelaŭ.
Redkaść pieratvarajecca ŭ dastatak, u ličbavy dastatak.
Jašče adzin prykład — sekvenavańnie DNK. Taki test, kali pluješ u prabirku, i tabie ź labaratoryi prysyłajuć tvoj rasšyfravany hienom. Ja heta zrabiŭ 7 hadoŭ tamu i ździviŭsia, što fajlik [z rasšyfroŭkaj] byŭ usiaho 26 mehabajt — jak dźvie pieśni. U 1999 hodzie hety test kaštavaŭ 2,7 miljarda dalaraŭ, siońnia jon kaštuje 100 dalaraŭ.
Ja niejak razmaŭlaŭ z uładalnikam adnaho vialikaha mabilnaha aperatara. Kali jany zapuskali biznes 20 hod tamu, samy lepšy prahnoz pa kolkaści abanentaŭ, jaki jany bačyli, byŭ 100—200 tysiač. Bo napačatku jany brali pa 100—200 novych klijentaŭ za dzień. Nichto z analitykaŭ nia moh i blizka ŭjavić, što hetaja technalohija budzie raspaŭsiudžvacca ekspanencyjna.
Kali padumać, što takoje 30 krokaŭ, to kožnamu zrazumieła, što heta 30 metraŭ. Kali padumać, što takoje 30 ekspanencyjnych krokaŭ, to heta 25 razoŭ vakoł ziamli, bo kožny krok pieravyšaje papiaredni ŭ dva razy.
U śviecie raznastajnaści važnaja redkaść
Na Siri my siońnia hladzim z uśmieškaj. Jamu ŭsiaho 7 hadoŭ, i nia ŭsio zroblena dobra. Projdzie jašče trochi času, i ŭ jaho intelekt budzie paraŭnalny ź intelektam 14-hadovaha dziciaci. I heta budzie prykładańnie zusim inšaha ŭzroŭniu. Što heta aznačaje?
Źniknuć koł-centry, panel kiravańnia aŭtamabilem — zamiest jaje budzie hałasavoje kiravańnie. Zabyvańnie źniknie, bo ŭ nas budzie pryłada, jakaja budzie supravadžać nas usio žyćcio i dapamahać nam zhadać infarmacyju tady, kali heta aktualna.
U 2013 hodzie było składana ŭjavić, što praz 5 hadoŭ drony buduć dastaŭlać tavary dla «Amazona».
U 2013 hodzie google glass vyhladali śmiešna. Siońnia palicyja Kitaja chodzić z analaham google glass i raspaznaje złačyncaŭ u realnym režymie.
Jak tolki praryŭnaja technalohija adličboŭvajecca, jana pačynaje ruchacca pa ekspanencyjnaj kryvoj u bok raznastajnaści.
Usiaho 20 hod tamu pry słovie «lichtaryk» my dumali pra pradmiet. Prajšło 20 hadoŭ, i lichtaryk — heta mabilnaja pryłada. Pradmiety robiacca «softam». I heta vialiki trend. Knihi byli pradmietam, siońnia heta elektronnaja versija.
Stvareńnie, množańnie, zachoŭvańnie tavaraŭ źniknie, kaštuje nul. U śviecie raznastajnaści važnaja tolki redkaść.
Ličbavaja ekanomika zrobić 40% kampanij nierelevantnymi ŭsiaho praz 10 hadoŭ
Zarablać hrošy možna dvuma šlachami: stvarajučy redkaść praz stvareńnie brendu sacyjalnaha ŭzajemadziejańnia, uražańniaŭ, kastamizacyi. Albo praz stvareńnie platformaŭ.
Za apošnija 20 hadoŭ bahata kampanij pakinuli suśvietny top-500. Bolšaść tych, chto ich zamianili, — heta platformy: Amazon, Spotify, Tesla.
Platforma — toje słova, za jakim siońnia varta vielmi ŭvažliva sačyć. Heta adzin z samych lepšych sposabaŭ zarablać hrošy ŭ śviecie ličbavaha dastatku.
My pieraaceńvajem toje, što budzie praz 2 hady. Ale my vielmi niedaaceńvajem toje, što budzie praz 10 hadoŭ. Z pryčyny liniejnaści myśleńnia.
Pamier suśvietnaj ekanomiki pavialičycca ŭ 3 razy za nastupnyja 40 hadoŭ.
Toje, čaho nie viedajem
Siońniašniaja adukacyja daje nam niapravilnaje adčuvańnie taho, što my viedajem usio.
My prychodzim u škołu, i nam raspaviadajuć, što było 5 tysiač hadoŭ tamu. Choć razumieńnia tych pracesaŭ nie było ani ŭ koha.
My prychodzim na fizyku, i ŭ nas stvarajuć adčuvańnie, što my razumiejem, jak zbudavany hety śviet. Choć abjektyŭna my nia viedajem, jakoha pamieru naš suśviet i što budzie, kali apuścicca na ŭzrovień uhłyb materyi. My nia viedajem, adkul usio heta ŭziałosia, navošta i čamu.
Ujavicie sabie śviet, u jakim adukacyja pačynałasia b nie z taho, što my viedajem, a z taho, čaho my nia viedajem.
Nakolki bolš cikavych, klasnych, kreatyŭnych idejaŭ mahli b sparadzić studenty.
U bližejšy čas vializarnaja kolkaść prafesij źniknie. Prafesii budučyni: vytvorca častak cieła, nanadoktar, fermer, jaki vyroščvaje hienna-madyfikavanyja pradukty, chirurh, jaki pavialičvaje pamiać, virtualny juryst i hetak dalej.
Śviet mianiajecca z kalasalnaj chutkaściu. Toje, što siońnia adbyvajecca, adbyvajecca ŭ 10 razoŭ chutčej i ŭ 30 razoŭ maštabniej, čym industryjalnaja revalucyja 100 hadoŭ tamu.
Siońnia treba dumać pra toje, jak pavialičyć vaš biznes nie na 10%, a ŭ 10 razoŭ.
Exegi monument…
My šmat čaho nia viedajem, ale jość adna reč, jakuju my viedajem dakładna. My viedajem, što my ŭsie pamrem.
I hety strach nastolki hłyboka ŭ kožnym z nas, što vyznačaje vialikuju kolkaść pavodzinaŭ ludziej, klijentaŭ, supracoŭnikaŭ.
Adziny sposab baraćby z hetym stracham — praca nad Immortality Projects [nieŭmiručyja prajekty]. Heta prajekty, jakija pieražyvuć nas.
Pravilnaje pytańnie, nad jakim treba dumać u dačynieńni da vašaha biznesu, — ci stvaraje jon štości, što vašyja klijenty ličać nieŭmiručym.
Usio, što nas akružaje, — pa svajoj sutnaści heta Immortality Projects ludziej, jakija žyli da nas. Dla kahości Immortality Projects — heta dzieci, relihija, biznes, chtości piša knihi, chtości stvaraje architekturnyja šedeŭry. Na heta možna hladzieć jak na sposab supakoicca.
Mienavita tamu pradprymalniki hanaracca, kali kažuć, što ich biznes budzie pracavać paśla ich śmierci.
My biessensoŭna hulajem u čužyja Immortality Projects. Dobryja prykłady — relihijnyja vojny, zvady, teraryzm.
Što takoje depresija? Adčuvańnie taho, što Immortality Project nie atrymlivajecca. Što takoje šyzafrenija? Heta krok jašče dalej, kali čałaviek prydumlaje sabie inšy śviet, u jakim jon bolšy hieroj, čym u realnym žyćci.
Časam nam važna pažyć jak žyvioły. Nia dumać pra toje, što kožny dzień pavinien być superpraduktyŭny, što treba šmat čaho paśpieć, i beścić siabie za toje, čaho nie zrabiŭ. Časam treba prosta rassłabicca i pažyć u adryvie ad hetaha.
Niemahčyma patłumačyć čałavieku, jaki vieryć u bitkojn, što budučynia śvietu za inšaj kryptavalutaj ci sukupnaściu kryptavalut. Sprečka pra heta — najezd na jahonaje hłybokaje adčuvańnie biaśpieki. I jana nia maje sensu. Viera — heta ruchavik Immortality Projects. Ludzi asabliva paśpiachova pracujuć, kali adčuvajuć, što vy vierycie ŭ ich značnaść dla dasiahnieńnia vašaha Immortality Project.
Strach śmierci — heta nie zaŭždy pra śmierć cieła. Časta heta pra stratu sensu.
Vielmi važna razumieć hety hłybinny drajver unutry kožnaha z nas, jaki vielmi dobra byŭ apisany Ernestam Bekieram [amerykanski antrapolah, aŭtar knihi «Admaŭleńnie śmierci»]. I jon tłumačyć, navošta faraony budavali piramidy. Dziela čaho Rasiei patrebnaja častka terytoryi Ŭkrainy, čamu niekatorym tak padabajucca bitkojny i inšyja rečy.
Immortality Projects — heta zaŭždy pra muraški pa skury i natchnieńnie. Kali my pracujem nad takim prajektam, my adčuvajem, što našaje žyćcio maje sens.
Jakoje praktyčnaje značeńnie heta maje dla kožnaha z nas? Siońnia heta važna tamu, što našym kampanijam treba vučycca i mianiacca tak chutka, jak nikoli raniej. Kab heta rabić, treba razumieć, što dla kožnaha z vašych supracoŭnikaŭ Immortality Project. Ci vieryć jon u vaš biznes jak u svoj Immortality Project? Ludzi hatovyja žyć na pracy, spać, nia jeści sutkami, tolki kali jany vierać, što hety biznes pieražyvie ich, a toje, što jany robiać, zastaniecca nadoŭha.
Ciapier pytańnie: Što budzie, kali dziakujučy technalohijam my zmožam žyć viečna? Ci budzie ŭ žyćci kožnaha z nas stolki ž drajvu, kab rabić sapraŭdy klasnyja i paśpiachovyja rečy?
