Pres-sakratar MNS raspavioŭ, što rabić, kab paźbiehnuć trahiedyi, jak u Kiemieravie
Situacyju ŭ Biełarusi ŭ kantekście pažaru ŭ Kiemieravie ŭ pytańniach i adkazach apisaŭ pres-sakratar MNS Vital Navicki na staroncy ŭ fejsbuku.
Ci moža ŭ nas paŭtarycca padobny pažar?
Dvuch adnolkavych pažaraŭ nie byvaje. Chutkaść raspaŭsiudžvańnia ahniu, technałohija tušeńnia zaŭsiody buduć adroźnivacca. Vučeńni, zaniatki i treniroŭki rehularna pravodziacca na ŭsich padobnych abjektach. Niaźmiennaj zastaniecca pryčyna — čałaviečy faktar. Dzicia z zapalničkaj, rabočy, jaki nie źviartaje ŭvahu na techniku biaśpieki, karotkaje zamykańnie śviacilnika mohuć adbycca ŭ lubym miescy.
Chto vinavaty ŭ hetym pažary?
Adkaz daduć kampietentnyja orhany, ale ŭ 99 vypadkach sa 100 vinavaty ŭładalnik abjekta. Mienavita jon adkazvaje za biaśpieku hramadzian. Tak, buduć šmatlikija ekśpiertyzy, zaklučeńni i h.d., ale kali da ciabie na abjekt prychodziać ludzi — mienavita ty adkazvaješ za ich biaśpieku.
Ci praviaraje MNS u Biełarusi padobnyja abjekty?
My možam pravodzić manitorynhi albo pazapłanavyja pravierki pa asablivych padstavach (u tym liku — nieananimny zvarot hramadzianina). Ale što tyčycca handlova-zabaŭlalnych centraŭ, my atrymali ŭkazańnie pravieryć ich usie. Budzie zroblena na hetym tydni.
Jak mnie daviedacca, ci biaśpiečny moj HZC, kudy ja zvyčajna chadžu?
Pryniata rašeńnie infarmacyju ab vynikach pravierak raźmiaścić u adkrytym dostupie. Ja padumaju, jak heta zrabić u zručnaj dla ludziej formie. Adras — 112.by
Jak mnie vyratavacca ŭ vypadku pažaru?
Pieršaje praviła — vychodźcie na vulicu. Kali spracavała sistema apaviaščeńnia pra pažar, to heta albo a) iłžyvaja spracoŭka, albo b) realny pažar. Ekśpierty va ŭsim śviecie rajać, navat kali vy ŭpeŭnienyja ŭ varyjancie a), usio adno pakidać pamiaškańnie.
Dapamažycie starym, dzieciam. Ruchajciesia da najbližejšaha vychadu. Na kožnym paviersie jość płany evakuacyi, ich možna vyvučyć zahadzia. Zvyčajna ich raźmiaščajuć kala liftaŭ i vialikich leśvic. Darečy, liftam karystacca pry pažary nielha — idzicie pa leśvicy.
U čym hałoŭnaja niebiaśpieka dla ludziej?
Ludzi na padobnych pažarach hinuć nie ad ahniu, a ad atručvańnia praduktami hareńnia. Navat lohki dym moža pryvieści da śmiarotnaha atručvańnia. Mienavita tamu pry paviedamleńni pra pažary na padobnym abjekcie my aŭtamatyčna dasyłajem bolš za 10 adzinak techniki. Čym chutčej na miesca prybuduć prafiesijanały, tym mienšymi buduć nastupstvy. Rot prykryvajcie mokraj tkaninaj, jość sens pryhnucca. Realna aceńvajcie svaje siły — kali pa niejkich pryčynach dym abo ahoń adrezali vam šlach da vyratavańnia, nie ryzykujcie. Šukajcie sposab paviedamić pra vas rabotnikam MNS (pryciahvajcie ŭvahu z voknaŭ, telefanujcie pa numary 101/112).
