Zasnavalnik Maps.me i Aimatter stvaryŭ u Biełarusi inviestkampaniju
Zasnavalnik MAPS.ME i AIMATTER Juryj Mielničak i jaho partnior Andrej Aŭsijevič, były top-mieniedžar kampanij «Atłant-M» i «Trajpł», adkryli ŭ Biełarusi inviestycyjnuju kampaniju Bulba Ventures, paviedamlaje TUT.BY.
Juryj Mielničak. Fota: TUT.BY
Jak paviedamlajecca ŭ pres-relizie kampanii, Bulba Ventures cikavyja biełaruskija startapy z mocnym techničnym składnikam. Mielničak i Aŭsijevič buduć inviestavać u prajekty na rańnich etapach. Da piaci startapaŭ mohuć atrymać padtrymku ŭ pieršy hod pracy kampanii.
Bulba Ventures skancentrujecca na biełaruskich startapach u halinie mašynnaha navučańnia, na styku realnaha siektara ekanomiki i IT. «Abodva partniory aktyŭna ŭciahnutyja ŭ raźvićcio i prasoŭvańnie prajektaŭ u partfieli kampanii. U startapaŭ budzie adkryty dostup da techničnaj i biznes-ekśpiertyzy IT-pradprymalnikaŭ dla raźvićcia svaich praduktaŭ. Akramia hetaha, kampanija hatova dapamahać startapam z pryciahnieńniem talentaŭ i PR», — havorycca ŭ paviedamleńni.
«Biełaruś niedaacenienaja zamiežnymi inviestarami. Stvareńnie inviestycyjnaj kampanii tut, u Minsku, — vydatnaja mahčymaść dla nas paŭpłyvać na źmianieńnie situacyi. Ja baču vialiki patencyjał u biełaruskaj startap-supolnaści. Razam z partnioram my raźvivajem tyja prajekty, za jakimi bačym budučyniu ŭ suśvietnym maštabie», — kamientuje Juryj Mielničak.
U aktyvie Juryja Mielnička — dva hučnyja «ekzity» biełaruskich prajektaŭ. MAPS.ME była pradadzienaja ŭ listapadzie 2014 hoda Mail.Ru Group, a AIMATTER — Google u žniŭni 2017. Apošniaja ździełka stała histaryčnaj dla ajčynnaj IT-industryi: heta była pieršaja kupla ajčynnaha startapa Google.
U startavym partfieli ŭ partnioraŭ kampanii dva prajekty. OneSoil — płatforma dla dakładnaha ziemlarobstva. WANNABY — startap ŭ halinie kampjuternaha zroku i elektronnaj kamiercyi.
