Biełastok i Hrodna aficyjna stali haradami-partniorami
Biełastok i Hrodna aficyjna stali haradami-partniorami 16 sakavika. Pra supracoŭnictva dvuch haradoŭ damovu padpisali staršynia hrodzienskaha harvykankama Miečysłaŭ Hoj i prezident Biełastoka Tadevuš Truskałoŭski, paviedamlaje Hrodna.life.
Damovu padpisali, kab zblizić miascovyja ŭstanovy, jakija, jak čakajecca, stanuć bolš ciesna supracoŭničać adzin z adnym, abmieńvacca vopytam u arhanizacyi miascovaha samakiravańnia, a taksama buduć razam ładzić sacyjalnyja, kulturnyja, spartyŭnyja mierapryjemstvy.
— Mižnarodnaje supracoŭnictva — najbolš efiektyŭny sposab prasoŭvańnia horada za miažoj, — skazaŭ Tadevuš Truskałoŭski. — Akramia taho, jość pramoje ŭździejańnie pa takich pytańniach, jak pryciahnieńnie inviestycyj, raźvićcio turyzmu i kulturnaha abmienu, paviedamlaje wyborcza.pl.
Da prykładu, dziakujučy damovie ab partniorstvie haradoŭ, univiersitet Biełastoka z 2009 hoda pravodzić sumiesnyja sieminary i abmieńvajecca studentami na čas navučańnia z amierykanskim univiersitetam Viskonsin. Miarkujuć, što tak ža budzie i z hrodzienskim pahadnieńniem — abodva harady chočuć pryciahnuć ustanovy, arhanizacyi i pradpryjemstvy, jakija buduć padpisvać asobnyja damovy pamiž saboj i raspracoŭvać kankretnyja prahramy supracoŭnictva.