Vypłaty bonusaŭ «tłustym katam» raściahnuć na 3—5 hadoŭ
Nacyjanalny bank rastłumačyŭ kamiercyjnym bankam, jakich padychodaŭ jany pavinny prytrymlivacca pry raspracoŭcy łakalnych dakumientaŭ, jakija tyčacca sistemy ŭznaharodžańniaŭ, piša Tut.by
«Vypłata kiraŭniku, jaho namieśnikam, členam kalehijalnaha vykanaŭčaha orhana banka ŭznaharodžańnia pa vynikach pracy za spravazdačny hod ci hadavoha bonusa pravodzicca častkami na praciahu 3—5 hadoŭ. Pry hetym pamier takoj vypłaty ŭ hod, što idzie za spravazdačnym, nie pavinien pieravyšać 60% ad jaje ahulnaha pamieru», — havorycca ŭ liście Nacbanka.
U vypadku, kali pamier hadavoha bonusa nie pieravyšaje try siaredniemiesiačnyja zarobki ŭ finansavaj śfiery, to pakazanaja vypłata moža być praviedziena całkam. Pa dadzienych za studzień, siaredniaja zarpłata ŭ bankach składała krychu bolš za 1800 rubloŭ.
Nacbank raić pry płanavańni na hod pakazčykaŭ pa apłacie pracy kiraŭnika, jaho namieśnikaŭ, členaŭ kalehijalnaha vykanaŭčaha orhana banka, a taksama rabotnikaŭ banka, uklučanych u pieralik rabotnikaŭ, jakija prymajuć ryzyki, raźličvać takim čynam, kab pamier nieharantavanaj (źmianianaj) častki apłaty ich pracy składaŭ nie mienš za 40%.
Nahadajem, u kancy 2017 hoda Nacbank adkarektavaŭ instrukcyju ab paradku i ŭmovach vypłaty bonusaŭ bankiram i paznačyŭ patrabavańni da arhanizacyi sistemy ŭznaharodžańniaŭ i kampiensacyj u bankach.
Tema zarobkaŭ i bonusaŭ top-mieniedžaraŭ bankaŭ, jakich ułady roznych krain nazyvajuć «tłustymi katami», na praciahu 2017 hoda niekalki razoŭ abmiarkoŭvałasia na naradach z udziełam Alaksandra Łukašenki. U chodzie adnaho ź ich prezident vykazaŭ niezadavolenaść tym, što ŭ «zboryščam tłustych katoŭ» dachody našmat vyšejšyja, čym u prostaha naroda, jaki «nie barstvuje». Tamu było dadziena daručeńnie navieści paradak z apłataj pracy rabotnikaŭ bankaŭ. U jakaści adnoj ź idej abmiarkoŭvałasia pryviazka zarobkaŭ kiraŭnikoŭ kamiercyjnych bankaŭ da akładu kiraŭnika Nacbanka. Pa sutnaści, heta aznačała istotnaje ŭrazańnie dachodaŭ bankiraŭ. Adnak dadzienaja inicyjatyva vyklikała niezadavolenaść u bankaŭskich kołach i paznačyła ryzyki, da jakich moža pryvieści raskułačvańnie bankiraŭ — adtok kvalifikavanych kadraŭ albo vypłata bonusaŭ «u kanviertach».
