Terapieŭt ab prastudzie: Nie treba bajacca, nie zaŭsiody patrebnyja leki, časam dosyć prosta źmianić ład žyćcia

Taćciana Jerafiejeva.

— Zima ŭžo chutka skončycca, a surjoznaj epidemii prastudnych zachvorvańniaŭ i hrypu ŭ hetym siezonie jašče nie było. Ci značyć heta, što ŭžo možna rassłabicca i nie bajacca ich prychodu?

— Sapraŭdy, u hetym hodzie chvarejuć krychu mienš, čym u minułym i pazaminułym hodzie, adnak nieabchodna pamiatać, što ŭ našaj krainie siezonnym pikam źjaŭlajucca luty i sakavik — heta značyć, usplosk zachvorvańnia moža być jašče napieradzie.

— Da jakich surjoznych uskładnieńniaŭ moža pryvieści lubaja, navat samaja biaskryŭdnaja prastuda?

— Lubaja prastuda moža pryvieści da ŭskładnieńniaŭ, u pieršuju čarhu z boku vierchnich i nižnich dychalnych šlachoŭ. Heta sinusit (hajmaryt, francit), atyt (zapaleńnie siaredniaha vucha z mocnymi bolami), branchit i pnieŭmanija. Radziej my nazirajem sistemnyja ŭskładnieńni, jakija nie zakranajuć orhany dychańnia — mijakardyty (zapaleńnie sardečnaj myšcy), zapaleńnie nyrak, jašče radziej mieninhit i encefalit (zapaleńnie hałaŭnoha mozhu i jaho abałonak).

— Jak my možam praduchilić uźniknieńnie hetych uskładnieńniaŭ?

— Samaja lepšaja prafiłaktyka ŭskładnieńniaŭ — heta pryščepka (kali havorka idzie pra hryp) i pravilnaje lačeńnie. Kali vy ŭsio ž zachvareli — pry vysokaj tempieratury prytrymlivajciesia paścielnaha režymu, picie šmat vadkaści, prymajcie pryznačanaje lačeńnie.

— Vydzialeńni z nosa i čchańnie — adny ź simptomaŭ prastudnych zachvorvańniaŭ. Jakaja pryroda hetych źjaŭ? Što prymušaje naš arhanizm tak reahavać na prastudu?

— Heta prykmiety samaačyščeńnia, bo nos pieršym kantaktuje ź infiekcyjaj. Kab hetuju infiekcyju vyvieści, pačynaje vydzialajecca śliź. Heta ŭsio dziela ačyščeńnia našaha arhanizma. Razam sa śliźziu z nosa vydzialajecca infiekcyja. Z čchańniem jana vychodzić jašče lepš i bolš efiektyŭna.

Pry virusnaj infiekcyi — a ŭ pačatku čaściakom heta mienavita virusnaja infiekcyja, — vydzialeńni z nosa bolš prazrystyja i vadzianistyja, i jany bolš zaraznyja. Kali praź niekatory čas źjaŭlajucca bolš ciomnyja, žoŭtyja ci zialonyja vydzialeńni — heta aznačaje, što dałučyłasia bakteryjalnaja mikrafłora i čałaviek užo mienš zarazny.

— Voś ja zachvareŭ. Maje pieršyja dziejańni?

— Usio zaležyć ad kankretnaha vypadku. Nie kožnaja prastuda maje patrebu ŭ pryjomie lekaŭ. Časam dastatkova prosta źmianić ład žyćcia, pić patahonnuju harbatu z malinaj abo lipaj. Ja nie prychilnik pryjomu lekaŭ ź pieršaha čchańnia. Adnak,

kali vaša tempieratura vyšejšaja za 38 hradusaŭ, chvaroba prajaŭlajecca nie tolki nasmarkam i tempieraturaj, ale i zadyškaj, vyraznaj słabaściu, to tady varta prymać leki i nieabchodna źviarnucca da doktara.

— Ci adrazu varta prasić balničny ŭ doktara?

— Časta ludzi pieraaceńvajuć niebiaśpieku i ryzyki prastudnych zachvorvańniaŭ. Nie zaŭsiody prastuda — heta niešta supierciažkaje i niebiaśpiečnaje. Dobra, što ludzi chodziać da lekara i praviarajucca, ale niaredka prastyły čałaviek zachoŭvaje pracazdolnaść. Nie treba va ŭsich vypadkach upadać u krajnaści i ŭkładvacca ŭ łožak na dva tydni. Byvaje, što rezkaje źnižeńnie aktyŭnaści tolki padaŭžaje čas chvaroby.

Ciapier da nas prychodzić šmat prastyłych, u tym liku tych, chto žadaje atrymać balničny. Choć my bačym, što niekatoryja ź ich pracazdolnyja. My vielmi chacieli b, kab ludzi išli da lekaraŭ nie tolki pa papierku, ale i pa paradu, jakoj jany buduć prytrymlivacca.

I hałoŭnaje pažadańnie ŭsim čytačam: starajciesia nie chvareć! Dla prafiłaktyki prastud treba sačyć za saboj i svaim ładam žyćcia. Kali vy pracujecie za kampjutaram u ofisie, dzie šmat ludziej, nie zajmajeciesia fitniesam, u vas jość lišniaja vaha i šmat škodnych zvyčak, to imunitet budzie słabym, častyja infiekcyi vam zabiaśpiečany. Nieabchodna adkazna stavicca da svajho zdaroŭja i vieści zdarovy ład žyćcia, tady imunitet budzie mocny i vy nie zachvarejecie!

AAT «Ekzon» UNP 200433278

0

0

0

0

0

0