U Biełarusi ŭpieršyniu ŭ historyi źjaviŭsia załacisty šakał FOTA
Załacisty šakał papoŭniŭ aficyjny śpis sysunoŭ Biełarusi, paviedamiŭ karespandentu BiełTA supracoŭnik navukovaha adździeła nacyjanalnaha parku «Biełaviežskaja pušča» Vadzim Prakapčuk.
Redki dla Biełarusi vid byŭ zdabyty padčas palavańnia 9 śniežnia 2017 hoda ŭ vakolicach vioski Chabovičy Kobrynskaha rajona.
Kab identyfikavać nieviadomuju žyviołu, infarmacyja i fatahrafii byli raźmieščany na palaŭničym internet-forumie. Apieratyŭnaja suviaź dazvoliła nie zhubić najkaštoŭniejšy asobnik — tuška i škura žyvioły trapili ŭ ruki navukoŭcaŭ.
Uzory tkanak byli zaśpirtavany i adpraŭlenyja ŭ Minsk. Detalovy analiz DNK, praviedzieny śpiecyjalistami navukova-praktyčnaha centra Dziaržaŭnaha kamiteta sudovych ekśpiertyz z vykarystańniem mižnarodnaj bazy dadzienych, paćvierdziŭ, što ŭzory tkanak naležać darosłamu samcu załacistaha šakała.
«Takim čynam, havorka idzie pra novy, 82-i pa liku, vid teryjafaŭny Biełarusi. Znakavym źjaŭlajecca mienavita toje, što heta pieršy asobnik, dla jakoha jość poŭnaja navukovaja atrybutyka: etykietka, čerap, škura, hienietyčnyja ŭzory», — adznačyŭ Vadzim Prakapčuk.
Załacisty šakał hałoŭnym čynam nasialaje paŭdniovyja rajony Jeŭropy, Aziju. U apošnija hady nazirajecca pašyreńnie areału jaho pražyvańnia ź istotnym prasoŭvańniem na poŭnač. Tak, źviera ŭžo nieadnarazova adznačali ŭ Polščy, Litvie, Łatvii. Jon addaje pieravahu adkrytaj prastory — zakinutyja mielijaracyjnyja sistemy z mnostvam kanałaŭ, zaraśnikami chmyźniakoŭ, tryśniahu.
