Staršynia Sajuza dyzajnieraŭ sabraŭ kalekcyju z 200 nažnic FOTY
U kalekcyi staršyni Biełaruskaha sajuza dyzajnieraŭ Dźmitryja Surskaha bolš za 200 nažnic. Dvaich absalutna adnolkavych nažnic u joj vy nie adšukajecie. Usie jany adroźnivajucca pa pryznačeńni, pamierach, materyjale, technałohii vyrabu, dyzajnie.
Čym vyklikanaja cikavaść spadara Źmitra da hetaj rečy, vyśvietliła karespandentka ahienctva «Minsk-naviny».
— Pierakanańnie, što nažnicy — pradmiet, varty ŭvahi, skłałasia ŭ mianie jašče ŭ dziacinstvie, — pryznajecca Dźmitryj Alehavič. — Pamiataju, my z baćkam prybirali ŭ haražy, i ja natknuŭsia na vialikija kavanyja nažnicy. Źbiraŭsia ich vykinuć, ale baćka spyniŭ. «Što ty, ni ŭ jakim razie! U Maskvie ŭ mianie jość tavaryš, jaki ich kalekcyjanuje. Padaru jamu, dastaŭlu radaść».
Pieršym adkaznym zadańniem u adździele narodnaha spažyvańnia Instytuta techničnaj estetyki, kudy Dźmitryja Surskaha raźmierkavali paśla zakančeńnia BDTMI, stała raspracoŭka nažnic: ich deficyt zdaryŭsia ŭ SSSR u pačatku 1980-ch. Dyzajniery prapanavali tady šyroki nabor instrumienta: dla zakrojščykaŭ, cyrulnikaŭ, dla stryžki žyvioł i dla raździełki na kuchni. Ale pačałasia pierabudova, i płany zastalisia nierealizavanymi: da vytvorčaści sprava tak i nie dajšła.
A kalekcyjanavać nažnicy spadar Surski pačaŭ niezadoŭha da svajho 50-hodździa. Napiaredadni jubileju ŭsim zaprošanym paviedamiŭ: «Nie zamaročvajciesia z prezientami, niasicie nažnicy».
— Adzin pryjaciel padaryŭ spajanyja adny z adnymi nažnicy dla razrazańnia stužačak na ŭračystych cyrymonijach adkryćcia, — raspaviadaje dyzajnier. — Druhi, pa prafiesii kaval, prapanavaŭ ŭłasnaručna vykavanyja vialikija aŭtarskija nažnicy. Treci ŭručyŭ pryviezienyja ź Nicy nažnicy z paličkaj, pryznačeńnie jakoj spačatku zastavałasia dla mianie niezrazumiełym. Tolki kali staŭ aktyŭna naviedvać aŭkcyjony (u tym liku zamiežnyja), vyśvietliŭ: heta stałovy prybor, pryznačany dla adrazańnia jahad vinahradu z hronki.
Admysłovyja nažnicy dla ŭračystych cyrymonij.
Z tych časoŭ D. Surski ŭžo nie spyniaje svajho zachapleńnia. Kožny asobnik kalekcyi jamu pa-svojmu darahi, usie jon pamiataje «ŭ tvar». Voś dosyć staražytny ekzemplar samatužnaj vytvorčaści ź niezamknutymi kolcami, jakija prymianiajucca dla stryžki aviečak.
Šmat u jaho zbory kravieckaha instrumientu: naprykład, vialikija nažnicy firmy «Zinhier» abo nažnicy «Zihzah», kab nie absypalisia apracavanyja krai ščylnaj tkaniny, nažnicy dla prarazańnia prareškaŭ.
A voś nažnicy ŭ viktaryjanskim styli dla adkryvańnia paštovych kanviertaŭ i razrazańnia papiery: jany zachoŭvajucca ŭ śpiecyjalna mietaličnym čachle, bahata dekaravanym, jaki vonkava nahadvaje nožny dla korcika.
Cikavyja nažnicy dla adrazańnia vierchu jajek, zvaranych «u miašočak».
A voś nažnicy, pryznačany dla raździełki torta: z nažom i łapatačkaj.
Jość kuchonny asobnik, jaki kaliści prajektavaŭ i vykanaŭ u štučnym varyjancie sam D. Surski — dla raździełki kaladnaj indyčki.
Źviartajuć na siabie ŭvahu i niezvyčajnyja pa formie, padobnyja na ptušku ź dziubaj, nažnicy dla źniaćcia naharu sa śviečki.
Niadaŭna Dźmitryju Surskamu prapanavali vystavić kalekcyju ŭ Niaśvižskim pałacy. Heta budzie pieršy vychad jaho schovišča «ŭ śviet», na šyrokuju publiku.