Łukašenka: U nas niekatoryja rektary zabranzavieli i paraśli cinaj, treba pierakrojvać prahramu ŭ VNU
president.gov.by
Alaksandr Łukašenka zapatrabavaŭ «pierabudavać, pierarabić, pierakroić» prahramy VNU. Na plenarnym pasiadžeńni II Źjezda vučonych Biełarusi jon raspavioŭ, jak niadaŭna sustrakaŭsia z ajcišnikami, piša Tut.by.
— Z asablivym bolem jany adznačali, što nie chapaje rabočych ruk. A pracoŭnyja ruki, vy viedajecie, jakija — mazhavityja, intelektualnyja, jakija ŭmiejuć razmaŭlać z mnohimi sučasnymi srodkami vytvorčaści.
Pa słovach kiraŭnika krainy, ajcišniki paprasili jaho dazvołu «tracić svaje hrošy na padtrymku VNU i vykładčykaŭ», kab jany šukali patrebnych dla ich studentaŭ.
— Ja kažu: «Dy Haspodź z vami!» Pierachryściŭ ich: z zaŭtrašniaha dnia pačynajcie. Jakija prablemy? — raspavioŭ kiraŭnik krainy i ŭdakładniŭ.
— Što ja ŭbačyŭ za hetym? Voś jany vielmi zapatrabavanyja, u asnoŭnym, vytvorčaści, kampanii — vielmi prybytkovyja, prybytkovyja. Adzin ź ich skazaŭ, što jon za hod asabista zapłaciŭ tolki padachodnaha padatku 1 miljon 200 tysiač dalaraŭ, nie budu nazyvać jaho proźvišča (imavierna, havorka idzie pra biznesmiena Viktara Prakapieniu) I im nie chapaje rabočych ruk, jany hatovyja siońnia inviestavać u našu adukacyju.
Adnak, miarkuje Łukašenka, univiersiteckija vykładčyki mohuć rasčaravać sponsaraŭ.
— U nas kiraŭnictva VNU, rektary zabranzavieli i paraśli niekatoryja cinaj. Ja ŭžo nie kažu pra vykładčykaŭ. Jany rychtujuć ludziej, jakija ŭžo siońnia nie mohuć pracavać, nie kažučy pra zaŭtrašni dzień. U nas mnohija VNU i vykładčyki sa svaimi žoŭtymi kanśpiektami platucca ŭ chvaście padziej.
Na dumku prezidenta, navuka i vykładańnie ŭ VNU katastrafična adstali ad raźvićcia vytvorčaści i jaje madernizacyi.
— U škołach zakančvajem hety praces — treba pačynać i ŭ VNU. Treba pierabudoŭvać, pierarablać, pierakrojvać prahramu, treba aryjentavać adukacyju na zaŭtrašni dzień, treba rychtavać vykładčykaŭ, a ŭžo potym stavić pytańni ab apłacie.