Pad Hancavičami 14-hadovaja školnica zaciažaryła ad fizruka
14-hadovaja vučanica 9 kłasa čakaje dzicia. A małady nastaŭnik čakaje vynikaŭ pravierki Śledčaha kamiteta.
Padrabiaznaści historyi pryvodzić «Hancavicki čas».
Zdaryłasia ŭsio ŭ adnoj sa škoł Hancavickaha rajona. Toje, što dziaŭčynka pačała dziŭnavata sabie pavodzić zaŭvažali nastaŭniki, ale školnica kazała, što ź joj usio ŭ paradku. Ale ŭ siaredzinie listapada jana ŭsio ž pryznałasia baćkam, što ciažarnaja.
U siamji dziaŭčynki byli prablemy. Tamu jana razam ź siastroj stajała na ŭliku, jak dzieci, jakija znachodziacca ŭ sacyjalna niebiaśpiečnym stanoviščy i dva razy nakiroŭvalisia na pražyvańnie ŭ Hancavicki sacyjalny prytułak, dzie pravodzili pa paŭhoda.
Sama školnica aktyŭna zajmałasia sportam. Niaredka pravodziła čas u kampanii 24-hadovaha fizruka.
U vioscy viedali, što małady mužčyna vyjaŭlaŭ cikavaść da dziaŭčynki i niaredka zaziraŭ u hości da vučanicy, padvoziŭ na aŭtamabili jaje razam ź jaje mamaj, jakaja nie zabaraniała prychodzić u ich dom. Administracyja škoły pravodziła prafiłaktyčnyja hutarki z nastaŭnikam, maŭlaŭ, nadta ciesnyja znosiny ŭ jaho z vučanicaj, ale toj ihnaravaŭ heta.
U vyniku školnica zaciažaryła. Nastaŭnik pryznaŭ, što dzicia ad jaho, skazaŭ, što škaduje, što tak atrymałasia. Pa jaho słovach, jon płanuje stvaryć siamju z vučanicaj i hadavać dzicia.
Praŭda, Śledčy kamitet užo zacikaviŭsia hetaj historyjaj. Pakul što pravodzicca pravierka. Kali zaviaduć kryminalnuju spravu, to za seks ź dziaŭčynaj, jakoj nie było 16 hadoŭ, fizruka mohuć pakarać pazbaŭleńniem voli. Maksimalny termin pakarańnia — 5 hadoŭ.